Lơ̆m ‘măng năm ngôi tơ̆ teh đak Phần Lan, ‘năr 21/10, Tổng Bí thư Tô Lâm păng hơkăn ƀok, yă Ngô Phương Ly hlôi tơƀâp kăn ƀô̆, bơngai jang tơ̆ dôm anih tang măt ăn Việt Nam păng bơngai dơ̆ng tang ăn tơpôl bơngai Việt tơ̆ teh đak Phần Lan, Đan Mạch, Thụy Điển păng Na Uy.

Tổng Bí thư tơƀôh đon hơiă tơ̆ hơnăp jơhngâm đon ‘mêm băt đơ̆ng kon pơlei bơ̆n oei xa tơ̆ teh đak đe – dôm “bơngai tang măt găh tơdrong joh ayŏ kơ dŏ xoang” vang tơgop tưk tơiung tơdrong pơvei ‘lơ̆ng hơiă đơ̆ng Việt Nam hăm dôm teh đak Bắc Âu. Tổng Bí thư pơma hơdăh, Đảng păng teh đak ling lang năng tơpôl bơngai Việt Nam tơ̆ teh đak đe jĭ 1 păh ưh đei tơpleh đơ̆ng hơdrĕch hơdrung, jĭ jơhngâm pran kăp gĭt ăn tơdrong jang tơiung pơjing păng vei lăng teh đak. Tơroi găh tơdrong jang mŭk drăm – tơpôl păng tơdrong hơmet ăn Hop akŏm mă XIV kơ Đảng, Tổng Bí thư pơma hơdăh, teh đak oei yak mât lơ̆m chăl jang tŏk iung ‘nao, năm truh đon pơhnŏng Kon pơlei pơdrŏng, teh đak pran kơtang, kon pơlei pơm tơm, hơtŏ băl, gơ̆h hơgei.