Đơ̆ng rŏng tơmơ̆ng tơroi đơ̆ng bơngai tang măt ăn kon pơlei, Tổng Bí thư chơt hơ-iă ah mă bơngai Việt tơguăt tơguăl vei răk tơƀăk mong joh ayŏ, pơm kiơ̆ tơnăp khôi luơ̆t tơ̆ teh đak hơrih jang xa, atŭm hăm kon pơlei Lào păng jing gơng tơroh tơbôl kăp gĭt kơ 2 hơdrung hơdrĕch. Kăp gĭt hloh, rim unh hnam Việt Nam hơnơ̆ng tơrĕk hăm pơlei pơla, tơrĕk pơtho pơhrăm đe sơnăm mơlôh vei pơma nơ̆r Việt, tơdrong juăt jue kơ jơhnơr hơrih păng joh ayŏ hơdrung hơdrĕch kơdih.

Sơkơ̆t hơdah, kon pơlei bơ̆n tơ̆ teh đak đe hơnơ̆ng jĭ minh pah tơguăt sĕch pham kơ hơdrung hơdrĕch, Tổng Bí thư ră hơdah Đảng păng Teh đak gô pơtoi keh đang tơchơ̆t tơgŭm kon pơlei bơ̆n tơ̆ teh đak đe lơ̆m asong jang, hŏk pơhrăm, hơlen băt, iung pơm jang, pơtho nơ̆r Việt, pơtho gah tơdrong hlôh vao păng hơtŏk dôm tơdrong joh ayŏ, hơpeh hơpong kon pơlei, kiơ̆ đơ̆ng noh hơtŏk tơguăt kon pơlei hơrih tơ̆ teh đak đe hăm teh đak kơdih.