Pơma tơ̆ jơ tơƀơ̆p pơma dơnuh, Tổng Bí thư Tô Lâm pơma hơdăh, gô hơdrin đĭ jơhngơ̆m, jang đang mă ‘lơ̆ng hơnăp jang đơ̆ng bơngai Tang măt kon pơlei Anih tơm, vă tơgăl hăm hơmĕng mă bơngai tăh hla lui ngeh. Găh tơdrong jang tang găn sa pơgơ̆m pơjĭp, ưh kơ ‘lơ̆ng, brăh brư, Tổng Bí thư pơma hơdăh, oei hơnơ̆ng pơgơ̆r kơtang, kơjăp, mă loi ‘noh jĭ đơ̆ng rŏng kơ Anih tơm Chĭnh trĭ, Ban Bí thư tơchơ̆t tơmơ̆t dơ̆ng tơdrong tơ jră brăh brư lơ̆m hơnăp jang đơ̆ng Anih pơgơ̆r jang Trung ương găh tang găn sa pơgơ̆m pơjĭp, ưh kơ ‘lơ̆ng.

Kŭm tơ̆ jơ tơƀơ̆p pơma dơnuh, Tổng Bí thư hlôi tơl nơ̆r dôm tơdrong bơngơ̆t truh đơ̆ng bơngai tăh hla, hơdai hăm athei Khŭl tang măt Quốc hội pơlei tơm Hà Nội jang hơdai hăm dôm anih jang kơ pơlei tơm chih iŏk pơđĭ nơ̆r tơgop đơ̆ng bơngai tăh hla, dăr hơlen dôm tơdrong vă athei dôm anih jang gơh kĭ ăn kơ Trung ương păng Quốc hội hơmet pơ ‘lơ̆ng.