Bơ̆jang kiơ̆ tơdrong jang tơƀơ̆p pơma dơnuh hăm bơngai tăh hla đơ̆ng rŏng ‘Măng hop akŏm mă 8, Quốc hội jăl XV, kơsơ̆ brei (2/12) tơ̆ Hưng Yên, Tổng Bí thư Tô Lâm kŭm hăm khŭl tang măt Quốc hội dêh char đei jơ tơƀơ̆p pơma dơnuh hăm lơ lap bơngai tăh hla lơ̆m pơlei tơm Hưng Yên vă roi tơbăt pơtôch ‘măng hop akŏm mă 8 păng tơl nơ̆r dôm nơ̆r apĭnh đơ̆ng bơngai tăh hla gơih truh Quốc hội. Đơ̆ng rŏng kơ mơ̆ng bơngai tang măt Khŭl tang măt Quốc hội dêh char Hưng Yên roi tơbăt dôm jơnei ‘lơ̆ng đơ̆ng ‘măng hop akŏm, lơ lap bơngai tăh hla lơ̆m pơlei tơm tơƀôh đon chơt hơiă Trung ương, Quốc hội, Khŭl kơdră teh đak gô hơnơ̆ng tŭn pran proh hơmet khŭl jang lơ̆m anih jang Đảng, Teh đak.

Pơma hơdăh, ‘nâu jĭ trong jang trŏ ƀlep păng gô jing tơdrong jang kach mang vă pơm tŏ sĕt bơngai jang teh đak, hơtŏk ‘lơ̆ng đei yua tơdrong jang đơ̆ng anih jang teh đak, tơklep hăm tơ jur ƀiên chê̆, tơ jur jên jang đơ̆ng khŭl jang chĭnh trĭ đơ̆ng Trung ương truh tơring, tơgop hơtŏk jên jang teh đak ăn tơmơ̆t jên jang hơtŏk tơiung păng bơ̆jang kiơ̆ tơdrong jang tơgŭm tơdrong hơrih sa, đei yua ăn tơpôl.

Kơsơ̆ âu mơ̆n, Tổng Bí thư Tô Lâm hlôi năm ngôi asong tơmam ăn ƀok Mai Văn Vĩnh, 73 sơnăm, lĭnh jĭ rơka 81%, ŭnh hnam bơngai đei kŏng lơ̆m xăh Liên Phương păng ŭnh hnam yă Bùi Thị Kiêng, rơneh sơnăm 1940 oei tơ̆ trong Bạch Đằng, phường Minh Khai ŭnh hnam mơmat tat đei lơ hơdrin yak tŏk lơ̆m tơdrong hơrih sa.