Pơgê năr 30/6, tơ̆ pơlei tơm Hồ Chí Minh hlôi pơgơ̆r Pơm lêh tơbăt hơdăh Tơdrong Tơchơ̆t đơ̆ng Trung ương păng tơring găh hơgrop hơnih bơ̆ jang dêh char, tơring, pơtôch hơnih bơ̆ jang kơ apŭng, pơjing hơnih jang đảng,  pôk hơtŏk kơdră chĕp pơgơ̆r đảng, jơnŭm vei lăng kon pơlei, Hơnih vei lăng kon pơlei, Hơnih bơ̆ jang Mặt trận Tổ quốc Việt Nam Pơlei tơm Hồ Chí Minh, tơring, phương, tơring kăl. Pơlei tơm Hồ Chí Minh pơih să, pơđĭ pơlei tơm HCM, dêh char Bình Dương păng dêh char Bà Rịa – Vũng Tàu. Tơ̆ hop akŏm, Tổng Bí thư Tô Lâm hlôi pôk ăn hla bơar tơchơ̆t đơ̆ng Hơnih tơm Chinh trĭ pôk hơtŏk ƀok Nguyễn Văn Nên - kơdră jang lơ̆m Hơnih tơm Chinh trĭ, Ƀĭ thư Đảng Pơlei tơm HCM - iŏk jang Ƀĭ thư Đảng pơlei tơm HCM đơ̆ng rŏng hơgrop. Hơnih tơm Chinh trĭ jei tơchơ̆t pôk hơtŏk 4 ‘nu Kơ iĕng Ƀĭ thư Đảng pơlei tơm HCM. Iung pơma tơ̆ pơm lêh, Tổng Bí thư Tô Lâm sơkơ̆t hơdăh, jơ lêh ưh khan lăp tơdrong kăl kơ trong bơ̆ jang, mă oei jing hơyak tơplih kơtang, jĭ tơdrong pơkoel kăl hloh đơ̆ng kon pơlei păng teh đak lơ̆m jăl trong tơ iung pơjing dôm tơring atŏk tơ iung pran kơtang kơ teh đak păng lơ̆m tơring, vă tơgăl hăm tơdrong hơpơi ‘meh vă “Việt Nam pơdrŏng nuih mơng lơ̆m sơnăm 2045”.