Pơma nơ̆r pơtho tơ̆ hop akŏm, Tổng Bí thư akhan, hrei ‘nâu jơ̆p lơ̆m teh đak oei tơplih tôch pran, đon tơchĕng đơ̆ng Đảng mât hơdai hăm jơhngâm đon kon pơlei hơpơi ‘mĕh yak tŏk lơ̆m chăl ‘nao, chăl jang tŏk kơ hơdrĕch hơdrung, adrin jang kĕh 2 tơdrong jang tơm 100 sơnăm (‘nŏh jĭ 100 sơnăm teh đak hăm tơdrong chĕp kơ̆l pơgơ̆r đơ̆ng Đảng păng 100 sơnăm pơjing teh đak).

Mă loi, sơnăm 2025 jĭ sơnăm tôch gĭt kăl vă pơih trong ăn chăl jang tŏk ‘nao, hăm 3 tơdrong jang tih athei jang kĕh ‘nŏh jĭ: Pơtôch Tơdrong tơchơ̆t kơsô̆ 18 păng tơplih ‘nao, hơmet ming khul bơngai jang lơ̆m rim anih jang chinh trĭ. Bơ̆ jang mă hrĕnh vă jang đei dôm tơdrong hơgăt đơ̆ng Hop akŏm mă XIII păng pơgơ̆r Hop akŏm đảng jơ̆p tơring, hơmet ‘lơ̆ng rim tơdrong vă gơ̆h pơgơ̆r đang ‘lơ̆ng Hop akŏm mă XIV kơ Đảng. Yoa thoi noh, rim kăn ƀô̆ lơ̆m Anih pơvih ăn Trung ương Đảng athei tơtăm, tơchĕng hơlen găh hơnăp jang đơ̆ng kơdih vă tơgop ăn dôm tơdrong jang tih kơ teh đak.