Iung pơma pơgơ̆r blŭng a, Tổng Bí thư Tô Lâm pơchoh ăn 2 tơdrong tơm vă Trung ương chă tơcheng, lăng hơlen, tơgop nơ̆r. Găh bơ̆ jang hơmet ăn Hop akom tih mă XIV kơ Đảng, Tổng Bí thư pơma hơdăh, tơ̆ Hop akŏm ou, Hơnih tơm Chinh trĭ tơbăt ăn Trung ương ăn asong tơgop nơ̆r hăm hla bơar pơtruh ăn găh hơnăn kơdră vang iung jang lơ̆m Khul kơdră chĕp pơgơ̆r Trung ương jăl XIV, vang jang lơ̆m Kơdră Hơnih bơ̆ jang Dăr lăng Trung ương jăl XIV păng pơgơ̆r tăh hla pơdrơ̆ng kiơ̆ tơƀôh ăn bơngai bơ̆ jang lơ̆m Khul kơdră chĕp pơgơ̆r Trung ương, Hơnih bơ̆ jang dăr lăng Trung ương kiơ̆ tơdrong tơchơ̆t. Pơma hơdăh, ‘nou jĭ tơdrong jang “gĭt kăl hloh”, “Kăl hloh kơ kăl hloh”, jĭ tơdrong tơchơ̆t hơdăh iŏk đei jơnei kơ Hop akŏm tih jăl XIV kơ Đảng păng tơdrong atŏk tơ iung kơ Teh đak lơ̆m chăl ‘nao, Tổng Bí thư Tô Lâm athei mưh rơih tơƀôh tơbăt ăn kơdră ‘noh kăl hơlen mă brĕ dôm tơdrong pơkăp ‘lơ̆ng kiơ̆ trong bơ̆ jang kơ Hop akŏm tih jăl XIV kơ Đảng păng rim tơdrong tơchơ̆t đei ƀơm truh. Kăl lăng đei iŏk yoa ăn kơ Đảng, ăn kơ teh đak, ăn kơ hơdrĕch hơdrung ‘noh tơm hloh, blŭng hloh; hơlen mă brĕ, mă lăp ƀar păh tơdrong pơkăp păng proh ăn; ƀar păh pơtăl ăn hăm atŏk tơ iung; ƀar păh dôm tơdrong hŏk pơhrăm jrŭ hăm tơdrong jang gơh yan ou; ƀar păh jơhngơm đon ‘lơ̆ng lui yom kơtang, bơ̆ jang gơh hơgei hăm kiơ̆ trong pơchoh ăn atŏk tơ iung; lơ̆m ou mă kăl ‘noh tơdrong bơ̆ jang ‘lơ̆ng, bơ̆ jang tơnăp, tơdrong tơgop kơtang đơ̆ng kang ƀô̆ vă pơm kơnăl, pơm pơkăp ‘lơ̆ng ăn tơdrong rơih tơmơ̆t.