Pơgê năr 13/10, tơ̆ Hơnih tơm Hà Nội, Hop akom tih kơdră tang măt Đang ƀô̆ Khul kơdră chĕp pơgơ̆r Teh đak ‘măng mă Blŭng, jăl jang 2025–2030 pơgơ̆r blŭng a. Tổng Bí thư Tô Lâm vang năm păng iung pơma. Tang măt ăn Hơnih tơm Chinh trĭ, Ban Bí thư, Tổng Bí thư hôn bơnê dôm tơdrong jơnei tih tên mă Đang ƀô̆ Khul kơdră chĕp pơgơ̆r teh đak iŏk đei lơ̆m jăl jang 2020–2025, mă kăl lơ̆m chĕp pơgơ̆r, pơrô̆ jang bơ̆ jang tơ iung pơjing tơdrong pơkăp, atŏk tơ iung mŭk drăm-tơpôl, tang găn jĭ jăn păng sơđơ̆ng hơrih sa ăn kon pơlei. Tổng Bí thư pơma hơdăh, Đang ƀô̆ Khul kơdră chĕp pơgơ̆r Teh đak kăl hơnơ̆ng pơm jŭk yŭk trong hơlou găh jơhngơ̆m đon chinh trĭ, jơhngơm đon gơh hơgei, bơ̆ jang ‘lơ̆ng păng tơplih ‘nao tơchăr; jĭ hơnih tơm tơgoăt pôm ƀơ̆r đon, drơ̆ng mĭnh nơ̆r păng iung jang lơ̆m pơ đĭ khul kơdră chĕp pơgơ̆r Teh đak. Ƀok athei tơ iung pơjing Đảng ƀô̆ tơpă rơgoh ‘lơ̆ng, pran kơtang; iung jang đĭ ai tang găn hơlou, iung tơjră phă pơrăm tơdrong sa pơgơ̆m pơjĭp, pơhoach brăh brư, bơ̆ jang ưh kơ ‘lơ̆ng; kiơ̆ yok hơnăp jang Khul kơdră chĕp pơgơ̆r Teh đak “pơchoh ăn atŏk tơ iung, jơhngơ̆m đon ‘lơ̆ng, iung jang tơnăp, pơvih pơvăn ăn kon pơlei”.

Pơma pơih pơgơ̆r Hop akŏm Bơngai tang măt Đảng bộ Khŭl kơdră teh đak ‘măng mă Mônh, Bí thư Đảng ủy Khŭl kơdră teh đak, Thủ tướng Phạm Minh Chính pơma hơdăh, Hop akŏm jĭ tơdrong jang chĭnh trĭ tôch kơ gĭt kăl, tơƀôh hơyak ‘lơ̆ng lơ̆m kơplăh pơjing Khŭl kơdră teh đak ‘lơ̆ng tơpăt, pơcheh hơgei, bơ̆jang, yua kơ teh đak, yua kơ kon pơlei. Hop akŏm tơlĕch ăn tơdrong hơgăt truh sơnăm 2030, Việt Nam jing teh đak tŏk bŏk hơtŏk tơiung đei kơmăy kơmŏk ‘nao, iŏk yua jô̆ păh lăp lơ, găh grŭp 30 teh đak jang mŭk drăm đei GDP tih hloh apŭng plĕnh teh.

Mŭk drăm tŏk jăl jang 2026–2030 athei hrĕnh, kơjăp, vei sơđơ̆ng dôm tơdrong hơtŏ tih. Hop akŏm tơlĕch ăn 10 hơnăp jang, trong jang tơm, akŏm chih pơkeh trong jang, pơklăih jơhngơ̆m pơm tơlĕch, hơvơn rim kon jên, pơm tơdrong ‘lơ̆ng ‘nao ăn hơtŏk tơiung, tŭn pran kơmăi kơmŏk ‘nao, hơgei; lăng khoa hŏk kơmăi kơmŏk, tơplih ‘nao hơgei păng tơplih kơsô̆ ‘noh jĭ tơdrong ‘lơ̆ng jang tŏk; pơjing tơdrong pơtho pơhrăm ‘nao, hơtŏk tơiung bơngai jang gơh hơgei.