Đunh kơ âu ƀlep 80 sơnăm, ‘năr 15/10/1945, Kơdră Hồ Chí Minh kĭ Hla ar tơchơ̆t pơjing 12 hơnih tơblăh, lơ̆m noh đei Hơnih tơblăh 4 -  hơnih blŭng a kơ Khŭl lĭnh Quân khu 4 hrei ‘nâu. Pơma tơ̆ jơ pơm lêh, Tổng Bí thư Tô Lâm pơma hơdăh, yak hloh 80 sơnăm pơjing, iung tơblăh păng jang đei, khŭl lĭnh Quân khu 4 hlôi iŏk đei lơ jơnei, tơgop lơ̆m jơnei đơ̆ng tơdrong jang rơngei hơdrĕch hơdrŭng, pơjing păng vei lăng teh đak.

Tổng Bí thư athei Quân khu 4 hơnơ̆ng vei kơjăp đon tơchĕng khŭl lĭnh Hồ Chí Minh, trong năm đĭ đăng kon pơlei vei sơđơ̆ng teh đak kơ Đảng; hơtŏk loi dơ̆ng tơdrong jang krao hơvơn kon pơlei, hơmet tơdrong pơvei pôm ƀơ̆r đon lĭnh - kon pơlei, tơgop pơjing jơhngơ̆m đon kon pơlei vei lăng teh đak păng grŭp pôm ƀơ̆r đon đĭ đăng hơdrĕch hơdrŭng kơjăp.