Drơ̆ng nơ̆r krao hơvơn đơ̆ng Kơdră teh đak Nguyễn Xuân Phúc, ‘năr 21/10, Tổng Thư ký Liên hợp quốc António Guterres pơtơm đei ‘măng năm ngôi tơ̆ Việt Nam. Khei ‘năr âu ki, jang hơdai đơ̆ng Việt Nam păng Liên Hợp quốc ưh kơ đei pơdơh đei hơmet ming păng hơtŏk loi dơ̆ng. ‘Măng năm ngôi pơgơ̆r ƀlep ƀơ̆t tơbăt 45 sơnăm Việt Nam mơ̆t jang hơdai lơ̆m Liên hợp quốc păng Việt Nam ‘nao jang đang hơgei hloh hơnăp jang Kơdră jang pơlơh kơ Jơnŭm vei lăng sơđơ̆ng Liên hợp quốc, hơdai hăm ‘noh ‘nao đei pôk pơm teh đak jang lơ̆m Jơnŭm vei lăng tơdrong pơm tơm kơ kon bơngai Liên hợp quốc jăl jang 2023-2025.

Kơdră teh đak Nguyễn Xuân Phúc păng Tổng thư ký Liên Hiệp Quốc

Tơchĕng hơdrol lơ̆m ‘măng năm ngôi, Tổng thư ký Liên hợp quốc gô năm kơkuh kơ ƀok Tổng Bí thư Nguyễn Phú Trọng, pơma đam hăm Kơdră teh đak Nguyễn Xuân Phúc, pơma dơnuh hăm Thủ tướng Phạm Minh Chính păng Kơdră Kuôk hô̆i Vương Đình Huệ.