Pơgê năr 1/4, hlôi pơgơ̆r Hop akom tơbăt hơdăh rim tơdrong tơchơ̆t đơ̆ng Hơnih tơm Chinh trĭ găh tơdrong jang, hơnih jang, tơchơ̆t pơjao, pôk tơmơ̆t bơngai chĕp kơ̆l kơ Radiô Pơdăh Tivi Việt Nam, Radiô Nơ̆r Pơma Việt Nam, Thông tấn xã Việt Nam, Viện Hàn lâm Khoa học xã hội Việt Nam, Viện Hàn lâm Khoa học păng Kmăi kmŏk Việt Nam jĭ hơnih bơ̆ jang găh Khul kơdră chĕp pơgơ̆r Teh đak jing hơnih bơ̆ jang kơ Hơnih chĕp pơgơ̆r Trung ương Đảng păng rim tơdrong tơchơ̆t ƀơm truh. Hop akom vă tơlĕch jang kiơ̆ Tơdrong tơchơ̆t kơsô̆ 03 năr 25/3/2026 đơ̆ng Hơnih chĕp pơgơ̆r Trung ương Đảng jăl XIV.

Tơ̆ Hop akom, tang măt ăn Hơnih bơ̆ jang ăn Trung ương hlôi tơbăt hơdăh rim tơdrong tơchơ̆t đơ̆ng Hơnih tơm Chinh trĭ, lơ̆m ou pơjao jang, pôk tơmơ̆t ƀok Đỗ Tiến Sỹ, Kơdră jang lơ̆m Trung ương Đảng iŏk jang dơ̆ng Kơdră chĕp pơgơ̆r Radiô Nơ̆r Pơma Việt Nam, jang hloi Kơ iĕng Kơdră chĕp pơgơ̆r Hơnih bơ̆ jang Pơtho tơbăt păng Pơrô̆ pơrôp Trung ương, vang jang lơ̆m Khul kơdră chĕp pơgơ̆r, Khul kơdră jang Đảng rim Hơnih bơ̆ jang Đảng Trung ương jăl jang 2025-2030.

Iung pơma pơrô̆ tơ̆ hop akŏm, Kơdră chĕp pơgơ̆r Ban Bí thư Trần Cẩm Tú athei rim hơnih bơ̆ jang chih kơtơ̆ng ang hơnơ̆ng iung jang ‘lơ̆ng sơnong jang kăl hloh lơ̆m bơ̆ jang tơbăt jơhngơ̆m đon ‘lơ̆ng, pơm hơtŏk jang ‘lơ̆ng pơchoh trong ăn kon pơlei pơla, iung jang tơdră tang găn, tơblang hơdăh rim trong pơm glăi hăm bơ̆ jang ‘lơ̆ng, gơh hơgei. Iung pơma tơ̆ hop akom, Thủ tướng Phạm Minh Chính pơma hơdăh athei vei kơjăp tơgoăt tơgoăl kơjăp, iung jang kiơ̆ jơnei dôm tơdrong iŏk đei, jang keh kong dôm tơdrong pơjao. Tơdrong pơjing tôm tong khul jang ou jĭ tôch gĭt kăl, tơgop pơm hơtŏk jơnei lơ̆m chĕp pơgơ̆r, bơ̆ jang jơnei kơ rim hơnih jang chih kơtơ̆ng ang, chă tơchĕng hơlen khoa hŏk kăl hloh.