Lăp 1,2 ‘măng pơih tĭt hăm kơmăy điên thoăi rơgei, mă đơ̆ng oei tơ̆ hnam dăh mă tơ̆ mir, pơgar cheh phe, ƀok Y Minh Niê, tơ̆ plei H’Đing, xăh Ea Tul, dêh char Đắk Lắk kŭm gơ̆h kla jên phŏng, jên pơgang dăh mă jên điên tôch kơ hiôk. Kiơ̆ ƀok Y Minh, hăm kơmăy ứng dụng đơ̆ng anih mong jên đei kai lơ̆m điên thoăi, lăp kăl đei internet ‘nŏh ưh lăp hiôk hian mưh chă kla jên đĕch mă oei gơ̆h truh hăm lơ tơdrong tơgŭm găh jên lơ̆m lơ tơdrong pơvih pơvăn dơ̆ng: “Adrol sơ̆ tam mă đei app ‘nŏh ba athei năm truh tơ̆ anih mong jên, oei dang ei gơih, kla jên hăm điên thoăi tôch ƀônh. Đei app anih mong jên ‘nŏh ba gơ̆h ‘mơ ‘met ƀiơ̆ jơ năr păng ưh đei hiong kŏng vih vât, tơ̆ hnam gơh gơih jên ‘năi”.

Oei hăm yă Nguyễn Thị Mỹ, tơ ‘ngla unh hnam tĕch tơmam ming man, pơvih pơvăn tơ̆ thôn 5, xăh Ea Tul, gơnơm đei app anih mong jên, tơdrong kla, iŏk jên tôch hiôk, vei lăng tôch rơđăh, mă loi ‘nŏh ưh kăl chĕp ba jên măt mă oei gơh gơih lơ̆m the, năng ‘nâu nhen thoi kơdŭng mong jên iĕ. Yă Mỹ kŭm jing “bơngai tôch juăt” hăm anih mong jên ‘năi, kơsô̆ jên yă tŏk iŏk đĭ hlŏh 4 ti bơih: “Tŏk iŏk jên tơ̆ anih mong jên đei 10 sơnăm ‘nâu bơih, Agribank tơgŭm, pơjing tơdrong ‘lơ̆ng asong tŏk iŏk jên vă jang xa. Tơdrong pơm hla ar ƀônh, hrĕnh, tơlĕch jên lơ̆m tai khoan hloi. Adrol ki oei năm nôp jên kon hơnơ̆ng tơ̆ anih thu jên, oei dang ei ‘nŏh nôp jên kon kiơ̆ trong chuyển khoản hloi, pơtih gia ‘năr 30 kla jên kon ‘nŏh dang ‘năr 25 inh gơih hơdrol bơih”.

Ưh lăp hăm hơdrô̆ bơngai pơdro đĕch, mă dôm HTX, anih tĕch mơdro kŭm đei xa yoa lơ đơ̆ng iŏk yoa kơmăy sô̆ âu ‘năi. Tơdrong jang hơdoi đơ̆ng anih mong jên hăm anih thuê̆ kŭm tơgŭm ăn anih tĕch mơdro jang hiôk ƀiơ̆ hơnăp jang kơdih, nôp jên thuê̆ rơđăh rơđong, da ƀiơ̆ hiong huach lơ. Mŏ Triệu Thị Hạnh, HTX choh jang xa păng pơvih pơvăn Bình Minh, xăh Cư Mgar tơroi: “Găh kế toán nhôn ƀôh app âu tôch đei yoa, nhôn ưh kăl năm tơ̆ anih mong jên hơnơ̆ng, mă gơ̆h jang lơ tơdrong hăm app âu hloi, ngôi kơtă tơ̆ công ty kŭm gơ̆h jang ‘năi”.

Năng tơdrong tơplih hăm kơmăy sô̆ jĭ tơdrong jang tơm vă pơm hơtŏk kơsư̆k pơjei băl, dôm anih mong jên tơ̆ dêh char Đắk Lắk oei hơtŏk tơdrong pơtho tơƀôh ăn kon pơlei, anih tĕch mơdro iŏk yoa kơmăy sô̆, atŭm hăm ‘nŏh chih hơdăh rim tơdrong đơ̆ng tơmoi hăm kơsô̆ ‘măn răk kơ teh đak găh tơring kon pơlei oei xa. Ƀok Huỳnh Công Sự, Phŏ Kơdră Anih mong jên Agribank Cư Mgar, ăn tơbăt: “Agribank Cư Mgar roi tơbăt ăn rim bơngai pơm kiơ̆ trong asong tŏk iŏk păng thu jên hre kơdih hăm ứng dụng E-banking, tơgŭm ăn đe da ƀiơ̆ hiong jơnăr, jên vih vât, kơchăng kla jên hre ƀiơ̆. Hăm anih mong jên ‘nŏh ‘mơ ‘met ƀiơ̆ jên pơm hla ar, jơnăr yak vih vât hơlen năng tơmam pơdơ̆ng păng 1,2 kơloăi jên huach nai, hơtŏk tơdrong đei yoa mưh bơ̆ jang, tơgŭm ăn anih mong jên thu trŏ, thu tôm păng tơtom”.

Kŭm hăm iŏk yoa kơmăy kơmŏk mưh bơ̆jang, dôm anih mong jên oei năng kăl truh tơdrong pơtho pơhrăm trong iŏk yoa kơmăy sô̆ ăn kăn ƀô̆, jang hơdoi hăm dôm anih jang kơpal vă pơjing đei kơmăy sô̆ sơđơ̆ng ‘lơ̆ng tơ̆ tơring. Yă Vũ Mai Sa, Phŏ Kơdră Agribank găh Tu Đắk Lắk ăn tơbăt: “Nhôn adrin tơlĕch dôm tơmam, tơdrong pơvih pơvăn hăm ứng dụng kơmăy kơmŏk ‘nao, hơmet pơ ‘lơ̆ng kơmăy CDM/ATM truh tơ̆ dôm tơring tơrang, tơring hơtăih yăih. Chih hơmet pơ ‘lơ̆ng kơsô̆ tơmoi, jên khei đei iŏk yoa mă lăp hăm kơsô̆ chih răk kơ teh đak găh tơring kon pơlei oei xa. Tơplih ming trong jang, kênh pơvih pơvăn tơ̆ dôm anih jang jing pơvih hăm kơmăy, pơvih tôm tơdrong hăm kơmăy sô̆, pơvih ưh kơ jô̆ anih dăh mă jơnăr yơ”.

Tơplih hăm kơmăy sô̆ oei tŏk bŏk jing jơhngâm pran gĭt kăl vă rim anih mong jên Đắk Lắk pơih xă tơdrong pơvih pơvăn găh jên hu, tơgŭm ăn kon pơlei tơ̆ tơring tơrang tŏk iŏk, kla jên păng vei lăng jên ƀônh hiôk ƀiơ̆. Ưh lăp truh hăm tơpang ti kon pơlei đĕch, anih mong jên jang hăm kơmăy sô̆ oei yak hơdoi kŭm hăm kon pơlei jang chŭn mir yak truh tơdrong choh jang xa hăm kơmăy kơmŏk ‘nao, vang tơgop bơ̆ jang đei đon pơhnŏng tơplih hăm kơmăy sô̆ đơ̆ng teh đak, jang tŏk mŭk drăm hăm kơmăy sô̆ truh tơ̆ pơlei pơla.