Kiơ̆ tơroi, khei năr ou ki khul kanh sat hlôi hơdrin vei lăng tơnăp, hơtŏk jang 'lơ̆ng tơdrong rôp vei, pơkăp phak kron; vei sơđơ̆ng tơpôl, sơđơ̆ng tơ̆ 54 hnam phak hăm 178 hơnih phak. Atŭm hăm noh, rim khul jang oei jang tơnăp tơdrong tơgŭm, pơm kiơ̆ tơdrong pơkăp lĕch hơdrol kơ khei năr pơkăp phak kiơ̆ tơchơ̆t. Lơ̆m 2 sơnăm kơ ou hăm hloh 32.000 pơnă đei pơkăp hơchăng hơdrol kơ khei năr pơkăp phak chŏng mă kơsô̆ bơngai pơm yoch hơlơ̆k tŏ sĕt đĕch (0,06%), tơƀôh hơdah tơdrong 'lơ̆ng gah đon bơnôh kon bơngai, tơdrong 'lơ̆ng kơ chăl pơgơ̆r teh đak bơ̆n, atŭm hăm noh tơƀôh tơdrong tơnăp lơ̆m tơdrong phak pơ-'lơ̆ng đon bơnôh pơnă.

Pôk bơnê kơ dôm tơdrong jang đei jơnei ou mă khul kanh sat vei lăng hnam phak jang đei lơ̆m khei năr ou ki; mă lei Tổng Bí thư, Kơdră teh đak bơ̆n Tô Lâm adoi akhan, bơ̆n duh athei lăng hơlen lăng mă hơdah tơdrong jang vei lăng, phak kron, pơ-'lơ̆ng đon bơnôh pơnă adoi oei đei lơ tơdrong tam mă trŏ hăm tơdrong hơrih tơpă. Tổng Bí thư, Kơdră teh đak bơ̆n Tô Lâm pơtruh nơ̆r, akŏm pơm kiơ̆ 6 tơchơ̆t tih, lơ̆m noh athei pơm tơplih 'nao trong pơm jang gah sek phak păng vei lăng pơtho pơ-'lơ̆ng, tơplih kơtang đơ̆ng vei lăng pơnă jing trong jang pơ-'lơ̆ng đon bơnôh kon bơngai. Ƀok adoi akhan, tơguăt hăm tơdrong sek phak hăm tang găn, păng ƀôh băt, tơjră hăm tơdrong pơm glăi păng pơjing tơpôl sơđơ̆ng 'lơ̆ng đơ̆ng tơm hloi.