Jĭ 1 lơ̆m dôm xăh ‘nao đei pơjing đơ̆ng rŏng kơ tơmât hơdai 3 xăh so: Mỹ Chánh, Mỹ Thành păng Mỹ Cát, xăh An Lương, dêh char Gia Lai dang ei đei teh xă 54 km² păng kơsô̆ kon pơlei hlŏh 6.000 ‘nu. Mă đơ̆ng tơring xă, kon pơlei lơ, khul kơdră pơgơ̆r xăh An Lương pơtơm bơ̆jang tôch tơnăp, sơđơ̆ng ‘lơ̆ng, khul kơdră pơgơ̆r tơlĕch lơ trong jang pơvih ăn kon pơlei. Tơ̆ Anih pơm hla ar ăn tơpôl xăh, 3 grŭp pơm hla ar vei lăng tơm đei hơmet tôm kơmăy kơmŏk păng pơm hla ar hăm kơmăy điên tư ngăl. Dôm tơdrong pơm hla ar kăl ƀơm truh tơdrong arih xa kơ kon pơlei nhen pơm hla ar rơneh, hla ar lôch, hla ar pơkăp... đei iŏk pơm tôch hrĕnh. Lăp lơ̆m khei mă blŭng bơ̆ jang, xăh pơm đei vă jê̆ 700 blăh hla ar hô sơ hăm điên tư, đĭ đăng đei pơm kĕh trŏ năr pơkă ngăl.

Mĭnh tơdrong tôch hơiă dơ̆ng lơ̆m trong jang đơ̆ng xăh ‘nŏh hơnơ̆ng năng kăl truh tơdrong pơngơ̆t đơ̆ng kon pơlei mưh năm bơ̆ jang. Ƀok Võ Thanh Hoàng, Kơdră vei lăng kon pơlei xăh An Lương, tơroi: “Hlŏh 1 khei bơ̆ jang, nhôn ƀôh hơnăp jang đơ̆ng kăn ƀô̆ ‘nŏh athei pơvih mă ‘lơ̆ng ăn kon pơlei, pơm lăp hăm tơdrong ‘mĕh vă đơ̆ng kon pơlei. Tơring tôch tơrek păng tơlĕch lơ jên răt hơmet kơmăy kơmŏk. Dôm tơring nai tam mă răt kơmăy kơmŏk ‘nao mă lei tơring đei lơ kon pơlei kơ na hlôi răt hơmet kơmăy ƀŏk kơsô̆ tơrih tơrih, đei tơƀôh hơdăh tơ̆ man hinh. Bơngai yơ năm hơdrol ‘nŏh iŏk kơsô̆ hơdrol, năm đơ̆ng rŏng iŏk kơsô̆ đơ̆ng rŏng kơna gơ̆h sơđơ̆ng ‘lơ̆ng.”

Tơdrong tơplih ‘nâu đei kon pơlei tơchĕng ‘lơ̆ng. Ƀok Lê Ngọc Trọng, bơngai oei xa tơ̆ xăh An Lương hăm 2 ‘măng năm pơm hla ar lơ̆m khei tơroi: “Kăn ƀô̆ anih jang pơtho tơƀôh pơm hla ar hrĕnh, ƀônh, hla ar pơm ăn inh kơtă lơ̆m năr hloi.”

Tơ̆ xăh groi kông Canh Vinh, đơ̆ng rŏng kơ tơmât hơdai đei teh xă vă jê̆ 260 km², tơring đei lơ tơdrong krê, hăm lơ pơlei pơla kon kông tơ̆ tơring hơtăih yăih, tơdrong ‘nao pơm juăt hăm trong pơm hla ar ‘nao, jê̆ hăm kon pơlei jing đon tơtăm tih hăm khul kơdră  tơring. Ƀok Dương Hiệp Hòa, Kơdră vei lăng kon pơlei xăh Canh Vinh, ăn tơbăt tơring hlôi jang pơlong năng dôm “anih pơm hla ar vei lăng” tơ̆ tơring hơtăih kơ xă vă pơvih ăn kon pơlei:

“Đơ̆ng pơmat tat mă khul kơdră tơring pơcheh đei trong jang rơgei, pơjing đei dôm anih pơm hla ar ăn kon pơlei. Adrol kơ ‘nŏh, pơjing 1 anih iŏk pơm hla ar tơ̆ plei Canh Hiển vă pơvih ăn dôm pơlei hơtăih nhen plei Canh Hiệp, plei Canh Tiến. Năm truh tơdrong pơjing dôm anih pơm hla ar jŭm dăr vă tơgŭm ăn kon pơlei. Tơdrong jang păng kơmăy kơmŏk ‘nao gô tơgŭm ăn dôm pơlei hơtăih pơm thoi yơ vă kon pơlei gơ̆h jang kiơ̆, pơm hla ar hrĕnh, jăh pơm lăp hăm rim tơdrong 'mĕh vă.”

Tơdrong bơ̆ jang jê̆ kon pơlei âu oei tơƀôh hơdăh kiơ̆ đơ̆ng khul kăn ƀô̆ jang tơnăp 'lơ̆ng hai. Mŏ La Thị Huyền Giang, kăn ƀô̆ Anih pơvih lơ̆m tơpôl kơ xăh Canh Vinh, tơroi: “Mưh tơlĕch jang kiơ̆ Khul kơdră pơgơ̆r tơring 2 tăl, inh ƀôh roi jê̆ hăm kon pơlei tơ̆ tơring. Mưh truh bơ̆ jang, 1 kơsô̆ kon pơlei pơma nuh vă pơm hla ar mă lei tam mă băt hơdăh tôm tơdrong ‘nŏh inh roi tơƀôh ăn, pơma nuh hăm kon pơlei hăm nơ̆r đe sư vă đe ƀônh hlôh, bơ̆ jang kŭm ƀônh ƀiơ̆.”

Lăp đơ̆ng rŏng 1 khei bơ̆ jang kiơ̆ Khul kơdră pơgơ̆r tơring 2 tăl, dêh char Gia Lai đei lơ hơyak tŏk 'lơ̆ng lơ̆m tơdrong pơm hla ar vei lăng, tơplih hăm kơmăy sô̆, mă loi jĭ tơdrong đei yoa mưh pơm hla ar trư̆k tuyê̆n. Kiơ̆ Kơmăy pơvih pơvăn ăn teh đak, Gia Lai dang ei dơ̆ng mă 6/34 dêh char, plt lơ̆m teh đak găh kơsô̆ pơvih ăn kon pơlei păng anih tĕch mơdro.

Ƀok Hồ Quốc Dũng, Kơdră jang lơ̆m Trung ương Đảng, Bí thư Đảng dêh char Gia Lai, ăn tơbăt: “Truh âu kơnh, kiơ̆ trong jang vă hơnơ̆ng klăih song hơdăh tơdrong jang tơ̆ xăh. Dôm tơdrong jang mă Trung ương pơjao ăn dêh char mă lei mưh ƀôh xăh jang ‘lơ̆ng ƀiơ̆ ‘nŏh vă pơjao ăn xăh jang hloi. Găh noh dơ̆ng kŭm oei đei 1,2 tơdrong ưh kơlăp, kăn ƀô̆ xăh hrei ‘nâu đei 3 tăl ‘nŏh kăn ƀô̆ đơ̆ng dêh char athei năm jang, kăn ƀô̆ apŭng jur jang păng kăn ƀô̆ kơtă tơ̆ xăh hai. Kăn ƀô̆ tơ̆ xăh adrol ki lơ bơngai jang tam mă gan gơ̆h, yoa thoi noh vă juăt hăm jang tơdrong jang hrei ‘nâu athei đei dơ̆ng jơnăr pơtâp pơhrăm vă kăn ƀô̆ gơ̆h bơ̆ jang rơgei, ‘lơ̆ng rim tơdrong tơ̆ hơnăp kơnh.”

Tơdrong tơplih ‘nao, tŏ sĕt bơngai jang, jê̆ kon pơlei đơ̆ng khul kơdră pơgơ̆r xăh tơ̆ Gia Lai đơ̆ng rŏng 1 khei jang kiơ̆ trong Khul kơdră pơgơ̆r tơring 2 tăl ăn ƀôh, tơdrong đei yoa ‘lơ̆ng đơ̆ng Trong jang tih đơ̆ng Đảng. Oei đei lơ tơdrong athei jang, lơ tơdrong tơhlăk athei hơmet ming, mă lei hăm jơhngâm đon “Lăp pơma nuh vă jang đĕch” kŭm hăm tơdrong pơtho tơƀôh, vang yak hơdoi ‘lơ̆ng đơ̆ng Anih chĕp kơ̆l Đảng dêh char păng Anih vei lăng kon pơlei Gia Lai, khul kơdră pơgơ̆r xăh lơ̆m trong jang 'nao gô roi pran kơjăp, tơgăl hăm tơdrong jang lơ̆m chăl 'nao./.