Tơ̆ pơlei Kép, dôm tơdrong ƀlŏk hơdơ̆r lơ̆m ‘măng iung tơblăh sơ̆ đei ƀok Rơ Châm Kóp tơroi dơ̆ng hăm dôm tơdrong nuih mơng pran kơtang. Sơnăm 1965, ƀok pơm yu kĭch; ƀar sơnăm đơ̆ng rŏng ƀok đei pôk tơmơ̆t jang lơ̆m khul Đảng păng đei pơjao pơm thôn trơng pơlei Kep. Lơ̆m mă noh sơ̆, tơdrong jang kơ ƀok ‘noh pơrô̆ hơvơn khul hơdruh tơdăm vang mơt pơm ƀô̆ đô̆i, pơrô̆ hơvơn kon pơlei tơgop phe ƀa vă rong ‘me yu kĭch, rong ‘me kang ƀô̆ bơ̆ jang lơ̆m bri.“Ba đei pôk tơmơ̆t lơ̆m khul Đảng sơnăm 1967, đơ̆ng noh đei pơjao pơm thôn trơng, vei lăng pơlei Kép. Lơ̆m mă sơ̆, tơdrong jang bơ̆n ‘noh pơrô̆ hơvơn hơdruh tơdăm vang năm pơm ƀô̆ đô̆i; adoi pơrô̆ hơvơn kon pơlei chă tơra phe ƀa, đơ̆ng noh iok akŏm phe ƀa vă rong ‘me yu kich, rong kang ƀô̆ bơ̆ jang lơ̆m bri, tơ iung pơjing khul yân kuân.”

Tơblăh vang hlôi đĭ tơ̆ rŏng, dôm bơngai hlôi đei tơgop jơhngơ̆m vei lăng pơlei pơla sơ̆ dang ei ƀôh hơdăh pơlei pơla tơplih ‘nao. Hăm kon pơlei  Ia Ly, jơhngơ̆m đon ‘noh hơnơ̆ng tơgoăt kơjăp hăm hơdrin jang sa, tơplih jơhngơ̆m đon tơchĕng, trong jang sa vă jang sa đei iŏk yoa kơjăp.

Tơ̆ pơlei Ia Ping, ƀô̆ đô̆i so Bùi Quang Trung rơih iŏk jang sa pơtăm lơ hơdrĕch ‘long, chă pơtăm hrou ‘long pơtăm, đơ̆ng sâu riêng, chehphe truh lơ ‘long sa plei anai. Tơdrong jang ou minh păh ưh kơ lon teh, mĭnh păh tơgŭm ăn ŭnh hnam jang sa đei iŏk yoa prăt sơnăm, dă ƀiơ̆ hiong răm lơ mưh kơjă mĭnh ‘long pơtăm ưh sơđơ̆ng. Ƀok Trung tơbăt, trong jang pơtăm hrou adoi tơgŭm ăn jang sa minh sơnăm iŏk đei truh 500 triu hlak jên. Ưh khan pơm hơtŏk đei iok yoa kơjăp lơ̆m hơgăt teh, trong jang ou oei tơgŭm ăn ŭnh hnam sơđơ̆ng jơhngơ̆m lơ̆m tơdrong tơplih tĕch răt ou to.“Ba pơtăm hrou ou ‘noh dôm ‘long pơtăm ou hăm tơgŭm dih băl, pơyan ayơ tơmam ‘noh, dơnơm ‘long ‘nou đĭ ‘noh đei iŏk yoa đơ̆ng dơnơm ‘long mă to kơna tơdrong jang sa kơ ŭnh hnam hơnơ̆ng sơđơ̆ng.”

Lăp đơ̆ng rŏng proh hơmet groi teh, tơring Ia Ly đei dơ̆ng groi teh vă iung jang rim tơdrong đei găh cham char păng tơdrong oei sa. Tơmang pơhiơ̆ pơlei pơla đei tơring sơkơ̆t hơdăh jing mĭnh trong jang pơjing đei tơdrong jang sa ăn kon pơlei. Tơdrong oei sa kơ bơngai Jarai, cham char bri brăh atum hăm dôm hơnih truh nhen chơkơi Công Chúa, chơkơi Đá Cổ păng Hơnih ming man ŭnh hơyuh đak Ia Ly tŏk bŏk đei tơgoăt vă pơjing đei tơmam tơmang pơhiơ̆. Rông pơlei Kep pơm keh đang lơ̆m jăl I sơnăm ou jei pơih dơ̆ng hơnih pơchơt pơhiơ̆ kơ kon pơlei, adoi pơjing hơnih kăl vă tơmoi năm tơmang lăng. Ƀok Nguyễn Văn Ánh, Ƀĭ thư Đảng tơring Ia Ly tơbăt, tơring sơkơ̆t hơdăh atŏk tơ iung mŭk drăm kăl tơklep hăm vei răk tơƀăk mong păng atŏk tơ iung dôm tơdrong oei sa joăt joe ‘lơ̆ng rŏ sơ̆ ki:“Kiơ̆ yok rok jơ̆ng tơring nuih mơng, tơring lăng ba kơjăp truh tơdrong oei sa joăt joe ‘lơ̆ng rŏ sơ̆ ki kơ bơngai Jarai, tơ̆ ou nhôn đei tơmang pơhiơ̆ pơlei pơla vă atŏk tơ iung tơdrong oei sa ‘lơ̆ng rŏ sơ̆ ki kơ bơngai Jarai. Hrei ou hlôi đei dêh char tơgŭm djru rim Tơdrong jang tơm teh đak tơ̆ pơlei Kép đei pơm rông ‘nao, iung jang tơmang pơhiơ̆ cham char tơ̆ rim chơkơi Công chúa, chơkơi đá cổ, hnam kmăi đak tơlĕch ŭnh hơyuh Ia Ly, đei dôm hơnih hnam kmăi đak tơlĕch ŭnh hơyuh tih kơ teh đak.”

Đơ̆ng dôm sơnăm tơblăh vang vei lăng pơlei pơla truh tơdrong jang tơ iung pơjing hơrih sa ‘nao hrei ou, jơhngơ̆m đon kĕch mang tơ̆ Ia Ly tŏk bŏk đei tơgoăt kơjăp hăm dôm tơdrong jang hơdăh. ‘Noh vei kơjăp tơdrong oei sa joăt joe ‘lơ̆ng rŏ sơ̆ ki, tơplih ‘nao choh jang sa, pơkom kon jên jang sa, vei lăng cham char păng iŏk jang jơnei dôm tơdrong đei kơ tơring. Dôm trong jang ‘noh tŏk bŏk tơgop pơm ăn dôm tơdrong joăt joe jing hơyak pran, pơjing đei hơyak kăl vă Ia Ly atŏk tơ iung kơjăp ‘lơ̆ng, dơ̆ng kơjăp tơ̆ hơnăp jăl trong hle.