Pơgê năr 2/7 tơ̆ Hơnih bơ̆ jang tơpôl tơring Tân Hà Lâm Hà, dêh char Lâm Đồng, mơjĭt ‘nu bơngai tŏk bŏk gô pơm hla bơar, mă kăl đei ƀơm truh găh tơdrong teh. Ƀok Phạm Duy Lâm, oei tơ̆ thôn Đức Bình năm tơ̆ ou mă băt pă đei apŭng bơih, pơm hla bơar Tơ-‘ngla teh kơ yuơ tơring pơm ăn. Đei kang ƀô̆ tơring bơ̆ jang tôch tơnăp chă pơtho ăn, ƀok Lâm chơt hơ iă păng lui tơdrong pơm hla bơar ou gô tĕnh koăng keh đang.“Năr ou ba năm pơm hla bơar ‘noh ba ƀôh đe kang ƀô̆ chă pơtho tôch kơ phăl, tơdrong yă kiơ đe sư tim mă gơ̆h vă xek ăn ‘noh đe sư pơkă jơ ‘năr pơm keh đang. Lơ loh, jĭ hơ iă tơpă mơ̆n, ba jei hơmŏ tơdrong pơm hla bơar jei keh đang tĕnh koăng mơ̆n.”

Jei năm pơm hla bơar đei ƀơm truh găh teh, yă Hoàng Thị Thanh Nhàn, tơ̆ bon B’Srê B, tơring Tà Đùng, dêh char Lâm Đồng jĭ tôch lăp đon hăm tơdrong tơplih ‘nao, bơ̆ jang tơnăp păng phal hơlăng đơ̆ng khul kơdră chĕp pơgơ̆r tơring. Yă Nhàn hơpơi ‘meh vă, kon pơlei năm pơm hla bơar gô đei chih tơbăt jơhngơ̆m đon tơdrong bơ̆ jang tơnăp dăh mă lơ liơ kơ khul bơ̆ jang.“Kăl tơlĕch hrôih, vă kon pơlei đei nơ̆r tơgop, hôn bơnê dăh mă ưh kơ lăp đon, 5 sao ‘noh bơ̆ jang ‘lơ̆ng hloh, 4 sao ‘noh bơ̆ jang lăp ‘lơ̆ng pơtih gia lơ loh. Găh tơdrong châm điêm jei gô mơ̆ng kiơ̆ jơhngơ̆m đon, mă lei mưh khul kang ƀô̆ bơ̆ jang ‘lơ̆ng, tơnăp, phăl hơlăng lei ưh kơ jor kon pơlei hôn bơnê kơtang hloi.”

Đơ̆ng rŏng 1 giĕng jang kiơ̆ hơgrop, khul kơdră chep pơgơ̆r tơring tơ̆ Lâm Đồng hlôi iung jang, ‘măng blŭng jei ƀôh oei mơmat tat găh hơnih jang, kmăi kmŏk, mă kăl Hơnih bơ̆ jang pơm hla bơar. Vă hơmet pơ ‘lơ̆ng, khul kơdră chĕp pơgơ̆r tơring sơkơ̆t hơdăh bơ̆ jang đĭ keh đang tơdrong jang ưh kơ đĭ jơ, oei đei kon pơlei ‘noh oei jang hơnơ̆ng dĭng keh đang ‘mơ̆i mă pơdơ̆h. Ƀok Nguyễn Minh Toàn, Kơ iĕng Kơdră chĕp pơgơ̆r Hơnih bơ̆ jang vei lăng kon pơlei, jang hloi Kơdră chĕp pơgơ̆r Hơnih bơ̆ jang pơm hla bơar tơring Tân Hà Lâm Hà, dêh char Lâm Đồng tơbăt, tơring sơng iŏk xek tơlang păng pơtho tơbăt vă jê̆ 160 hồ sơ. Đei lơ tơdrong jang găh tơdrong jang kơ khul kơdră chĕp pơgơ̆r apŭng sơ̆ gơh jang. Mălei hăm tơdrong hơmet ăn ‘lơ̆ng păng tơplih ‘nao trong bơ̆ jang kiơ̆ trong iung jang tơgŭm ăn, khul kơdră tơring ‘nao hlôi bơ̆ jang gơh dôm tơdrong mă kon pơlei hơvơh jang. Ƀok Nguyễn Minh Toàn, sơkơ̆t hơdăh:“Nhôn hlôi sơkơ̆t hơdăh đơ̆ng hơdrol, tơdrong bơ̆ jang tơring ‘nao ‘noh trăp trĭn, dang ei nhen lĕ  100% tơdrong bơ̆ jang kơ Hơnih jang apŭng so pơjap ăn tơring ‘nao, kơna nhôn hlôi hơmet ăn đơ̆ng hơdrol tôch hơlen, ăn dôm kang ƀô̆ hơgei đei jơhngơ̆m đon ‘lơ̆ng hloh vă iung jang tơgŭm ăn kon pơlei. Hăm trong hơnih bơ̆ jang iung jang kơ yuơ kon pơlei kơna nhôn kơrŭn đĭ ai iung jang ‘lơ̆ng hloh vă kon pơlei năm pơm hla bơar ou to keh đang tĕnh koăng hloh.”

Xơkơ̆t hơdăh trong bơ̆jang ‘nao ‘noh iung jang tơgŭm ăn kon pơlei, tơ̆ lơ tơring, phương kơ dêh char Lâm Đồng hlôi păng tŏk bŏk tơplih ‘nao trong bơ̆ jang. Lơ tơdrong pơm hla bơar hlôi đei tơlĕch jang kloh klĕch dih băl kơ rim tơring tơrang. Hăm năm pơm hla bơar yă kiơ ‘noh, kon pơlei jei gơ̆h năm pơm hla bơar tơ̆ tơring, phương ou dăh mă tơring, phương anai kơna khul kơdră bơ̆ jang tơ̆ lơ tơring, phương anai kơna khul kơdră tơring, phương hlôi iung jang tơnăp apĭnh jet gia kon pơlei, hơnih mơdro sa păng lăng đe sư nhen tơmoi vă pơvih pơvăn.

Kiơ̆ đơ̆ng ƀok Trần Nam Thuần, Kơdră chĕp pơgơ̆r Hơnih bơ̆ jang tơring Tà Đùng, dêh char Lâm Đồng, tơdăh bơ̆ jang ưh tơnăp pơm ăn lơ kon pơlei năm tơ̆ tơring anai vă pơm hla bơar lei khul kơdră bơ̆ jang tơring ‘noh đei lăng jĭ bơ̆ jang ưh kơ ‘lơ̆ng. Kơ yuơ lơ loh, khul kơdră tơring tŏk bŏk tơlĕch jang kơtang vă khul kơdră chĕp pơgơ̆r ‘nao iung jang kiơ̆ ‘lơ̆ng bơ̆ jang pơvih pơvăn ăn kon pơlei, lăng kon pơlei, hơnih mơdro sa nhen lĕ tơmoi bơ̆n.“Tơplih kơtang hloh kơ khul kơdră chĕp pơgơ̆r tơring 2 kâp ‘noh akŏm vă iung jang pơvih pơvăn ăn kon pơlei păng hơnih mơdro sa. Iŏk đơ̆ng tơdrong ‘noh kơna đơ̆ng dôm năr blŭng hloi, Hơnih vei lăng kon pơlei tơring Tà Đùng hlôi hop akŏm, pơma tơbăt hơdăh ăn rim kang ƀô̆ vă tơplih jơhngơ̆m đon tơchĕng, trong bơ̆ jang. ‘Moi kiơ̆ trong tơbăt, pơtho khan vă kon pơlei băt hơdăh dôm tơdrong bơ̆ jang ‘noh jei jing trong vă hơvơn kon pơlei năm pơm hla bơar tơ̆ tơring.”

Đơ̆ng rŏng mĭnh giĕng bơ̆ jang kiơ̆ trong khul kơdră chĕp pơgơ̆r tơring 2 kâp ‘nao tơ̆ Lâm Đồng tŏk bŏk đei ƀôh hơdăh dôm tơdrong tơplih ‘nao toch hơ iă. Pă đei ngôi mĭnh hơnih, bơ̆ jang kiơ̆ trong so mă lei hlôi đei tơdrong tơplih ‘moi kiơ̆ ƀlep trong tơlĕch jang, trong pơchoh ăn đơ̆ng Trung ương tơlĕch ăn, ‘noh tơjê̆ kon pơlei, tơklep kon pơlei păng bơ̆ jang tơgŭm ăn kon pơlei ‘lơ̆ng hloh dơ̆ng.