3 tơring: Măng Đen, Măng Bút păng Kon Plông, dêh char Quảng Ngãi đei groi teh să, đei lơ tơdrong hơ iă ăn atŏk tơ iung choh jang sa, mŭk drăm bri păng tơmang pơhiơ̆ cham char. Yơ̆p ‘long hơyơ̆l groi teh kơtang, tơ̆ Măng Đen jơnei vă jê̆ 68%, tơ̆ Kon Plông jơnei hloh 83%, pơjing hơyak ‘lơ̆ng ăn atŏk tơ iung mŭk drăm rơgoh ‘lơ̆ng. Hrei ou bro Măng Đen – Măng Bút – Kon Plông đei tơdrong hơ iă kơtang vă atŏk tơ iung tơmang pơhiơ̆ cham char, pơdơ̆h pơdei păng choh jang sa “tơring tơngiĕt”, lơ̆m ou đei Măng Đen jĭ tơring kăl hloh. Ƀok Nguyễn Hoàng Giang, Kơdră chĕp pơgơ̆r Hơnih bơ̆ jang vei lăng kon pơlei dêh char Quảng Ngãi athei rim tơring atŏk kơtang atok tơ iung choh jang sa rơgoh ‘lơ̆ng, pơjing đei tơring choh jang sa hơ iă đei hơnăn nhen chehphe Arabica, Sâm Ngọc Linh, Đẳng sâm, ‘nhot pơkao tơring tơngiĕt pơvih pơvăn ăn tơmang pơhiơ̆.