Apŭng Kon Plông, dêh char Kon Tum đei plenh teh pơxư̆ ăn lơ tơdrong hiôk noh hơyuh tô̆ ‘mi ƀlep hăm lơ hơdrĕch ‘long pơtăm đei kơjă kăp găh mŭk drăm. Chŏng mă đơ̆ng rŏng hloh 15 xơnăm đei dêh char Kon Tum xơkơ̆t jing tơring jang mŭk drăm dơnơm, adrô̆ hăm tơdrong choh jang xa, apŭng duh tam mă pơjing đei tơmam drăm tih tên tĕch tơlĕch lơ̆m tơring.

Ƀok Đặng Quang Hà, Kơdră Anih vei lăng kon pơlei apŭng Kon Plông tơroi hơdăh, kơyuơ tam mă pơjing đei tơmam drăm tih xă, hơtŏk kơjă kăp gĭt noh mă đei hloh 20.000ha teh choh jang xa păng duh hlôi pơjing đei Tơring choh jang xa kiơ̆ trong ‘nao; tơring pơtăm ‘nhot, pơkao, ƀum, plei tơring tơngiĕt hăm hơgăt xă hloh 1.500ha mă lei kơjă pơm tơlĕch tơmam drăm âu kơ apŭng oei tŏ xĕt: “Kơjă tơmam choh pơtăm kơ apŭng Kon Plông dang ei adrô̆ đei pơhlom 770 rơtăl hlj hăm kơjă tơmam drăm lơ̆m tơring kơ jâ̆p apŭng. Thoi noh mă đei mŭk drăm hơtŏk choh jang xa pran mă lei tơdrong choh jang xa tam mă tơpă tơgăl hăm mŭk drăm oei đei dang ei. Anih jang Kơpal kơ apŭng, Anih vei lăng kon pơlei apŭng hlôi akŏm pơgơ̆r, tơlĕch Tơchơ̆t găh hơtŏk choh jang xa mă hlôi đei jơnei bơih, mă lei tơpă vă xơkơ̆t anih dơ̆ng ăn tơdrong choh jang xa kơ apŭng Kon Plông noh nhôn kơchĕng tam mă tơgăl hăm mŭk drăm kơ po”.

Truh Kon Plông dang ei kon pơlei duh nhen tơmoi gơhc hă xa lơ tơmam xa kăp gĭt tơ̆ tơring nhen: por chơke brê, sâm hroi, ka phê Arabica, tiu bri đang kơ noh dôm hơdrĕch ‘nhot, pơkao, ƀum, plei ‘long tơring tơngiĕt. Mă lei, tôm tơmam choh pơtăm kơ apŭng dang ei duh tŏk bŏk ăh pơm jang răh rai, ưh kĕ pơm tơlĕch nhen tơdrong pơkăp răt hăm kơsô̆ lơ. Ƀok Phạm Thanh, Kơdră Anih jang Tĕch pơdro Choh jang xa apŭng Kon Plông ăn tơbăt, dang ei dôm anih jang mŭk drăm axong choh jang xa lơ̆m tơring kơ apŭng Kon Plông tŏk bŏk đei dôm jĭt hơdrĕch ‘nhot, pơkao, ƀum, plei ‘long tơring tơngiĕt mă lei tam mă jing tơmam drăm dơnơm kơlih pơm jang răh rai. Ƀok Thanh akhan, hlôi truh jơ ‘năr choh jang xa kơ apŭng ưh kơ gơh pơm tơlĕch lang xă ưh đei pơkăp hăm tôm tơmam drăm hơdrĕch ‘long pơtăm: “Vă pơjing tơmam drăm pran truh âu kơnh gô tơguăt hăm dôm anih jang mŭk drăm lơ̆m tơring choh jang xa vă pơm tơlĕch tơmam drăm tĕch tơlĕch lơ̆m tơring xơđơ̆ng. Pơkăp akŏm lơ̆m minh ƀar tơmam tơm đĕch, ưh đei lơ nhen dang ei ôh noh tơnap vă pơjing tơmam yua”.

Tơmơ̆ng nơ̆r tơgop đơ̆ng dôm bơngai juăt jang, khul jang kơpal, Anih vei lăng kon pơlei apŭng Kon Plông xơkơ̆t, vă hơtŏk tơmam yua đơ̆ng choh pơtăm kiơ̆ pơkăp pơm tơlĕch tơmam yua, hơtŏk đei kơjă pơkăp noh athei xơkơ̆t dơ̆ng hơdrĕch ‘long pơtăm păng pơjing đei tơring pơtăm hơdrĕch ‘long pơkăp tih xă. Tơ̆ anăp apŭng gô hơtŏk đei 500ha tơm ka phê tơring tơngiĕt Arabica hơtŏk hơgăt âu truh 1.500ha; pơjing tơring pơtăm hla che Đông Trường Sơn hăm 500ha tơ̆ xăh Hiếu păng Pờ Ê; pơkăp vei lăng pơhlom 500ha tiu bri... Atŭm hăm noh tơlĕch pơjing hơnăn păng pơkăp tơring pơtăm ăn dôm tơmam drăm âu.

Pơm kiơ̆ hơdăh tơdrong pơkăp, dang ei Anih Tĕch pơdro Choh jang xa apŭng Kon Plông tŏk bŏk jang hadoi hăm anih jang mŭk drăm tơlĕch ơng rei tơđăh 2 hơdrĕch tơm hla che păng ka phê Arabica vă axong ăn kon pơlei. Jơnŭm pơgơ̆r dôm tơring đei xơkơ̆t hơtŏk tơring pơtăm ‘long dơnơm vă pơm jang duh hlôi tơroi găh trong pơkăp jang đơ̆ng apŭng truh hăm kon pơlei, atŭm hăm noh tơlĕch dôm trong jang hơdăh vă hơtŏk choh jang xa. Ƀok  Nguyễn Văn Bay, Phŏ Kơdră Anih vei lăng kon pơlei xăh Đăk Tăng, apŭng Kon Plông ăn tơbăt, jơnŭm pơgơ̆r tơring tŏk bŏk hăt hot pơtho kon pơlei vei lăng tơnăp 140ha ka phê tơring tơngiĕt oei đei, atŭm hăm noh pơkăp pơih xă hơgăt pơtăm hơdrĕch ‘long mă âu: “Xăh akŏm tơroi tơbăt, hơvơn kon pơlei vei khŏm mă đei hơgăt pơtăm ka phê tơring tơngiĕt. Xơkơ̆t mŭk drăm thoi noh xăh duh hlôi pơtruh nơ̆r hăm Anih jang Đảng, anih jang kơpal tơlĕch minh Tơchơ̆t vă hơtŏk 2 thôn pơtăm tơm ka phê tơring tơngiư̆t mă trŏ ƀlep, noh jing thôn Đăk Prồ păng thôn Đăk Tăng. Kiơ̆ tơdrong hop akŏm tơlĕch hơvơn noh kon pơlei drơ̆ng lăp păng pơm kiơ̆”.

Vă kĕ đei jơnei hơtŏk choh jang xa kiơ̆ pơkăp pơm tơlĕch tơmam yua, hơtŏk kơjă pơkăp, apŭng Kon Plông, dêh char Kon Tum tŏk bŏk oei hơtŏk jang hadoi đơ̆ng kon pơlei hăm anih jang mŭk drăm. Hăm 2 hơdrĕch ‘long pơtăm âu noh: ka phê Arabica păng hla che, apŭng Kon Plông hlôi tơroh hăm anih jang mŭk drăm pơkăp tơgŭm kon pơlei đơ̆ng hơdrĕch, jên jang, kih thuơ̆t truh tơ̆ răt tơmơ̆t tơmam drăm pơtăm đei. Hăm minh ƀar hơdrĕch ‘nhot, pơkao, ƀum, plei ‘long tơring tơngiĕt, apŭng tŏk bŏk oei hăt hot atŭm hăm anih jang mŭk drăm choh pơtăm tơrĕk hăm dôm anih siu thĭ, anih tĕch răt tơ̆ lơ dêh char, pơlei tơm kĭ pơkăp pơtruh tơmam pơtăm, kiơ̆ đơ̆ng noh xơkơ̆t tơdrong pơm jang hăm rim tơmam drăm. Đunh đai kơnh, apŭng Kon Plông gô pơkăp dơ̆ng tơdrong choh jang xa kiơ̆ hơtŏk tơdrong jang choh pơtăm kơjăp xơđơ̆ng, hơtŏk pơ ‘lơ̆ng kơjă kăp gĭt păng tơdrong tơgar tĕch tơmam drăm choh pơtăm đei.