Kŭm hăm trong chông tơlĕch kon pơlei, phường Sông Cầu oei akŏm jơhngâm, hơmet tôm tơmam, đak nhă, khul jang pơgang tơgŭm; atŭm hăm ‘nŏh ăn khul trư̆k prăt măng, prăt năr tơ̆ anih ƀato dơ̆ng păng tơring kon pơlei oei. Dôm hơdrao rong ka tơ̆ đak dơsĭ đei nơ̆r athei ưh ăn bơngai oei kơpal ‘nŏh.

Đei măt tơ̆ Kueng kơphô̆ Từ Nham, ƀok Đỗ Hữu Huy, Phó Bí thư Đảng dêh char Đắk Lắk dăr lăng dôm anih đei đak dơsĭ tŏk, năm ngôi hăm kon pơlei tơ̆ anih oei xa pơgia vă veh ver kơ ‘mi kial păng athei chông tơlĕch pơđĭ kon pơlei oei chă trong ôn tơ̆ hnam. Dêh char Đắk Lắk krao hơvơn kon pơlei ưh gơ̆h vih tơ̆ hnam ƀât oei đei ‘mi kial; pơm kiơ̆ mă ‘lơ̆ng nơ̆r kơ̆m lĕch tơ̆ đak dơsĭ păng nơ̆r pơtho đơ̆ng khul jang kơpal, vei lăng ‘lơ̆ng tơdrong arih lơ̆m 48 jơ đei ‘mi kial hơbŭt hơbang.

Jô̆ truh 'năr dơ̆ng năr 6/11, jơ̆p dêh char Gia Lai hlôi keh đang tơdrong 'nhăk hloh 100.000 unh hnam kon pơlei, truh oei anih sơđơ̆ng. Kơhrĕng hnam trưng hŏk, hnam akŏm joh ayŏ păng anih jang đei pơm jing anih oei găn kơ 'mi kial. Rim anih 'măn tơmam drăm, đak xăng đak dou, pơgang đei pơih să vă iŏk yua; unh hơyuh, viễn thŏng, hơmet jĭ jăn adoi asong pơm jang măng năr hloi vă vei sơđơ̆ng tơroi tơbăt, vei lăng jơhngơ̆m jăn ăn kon pơlei.

Hăm tơdrong tơhlu hli hlơt kơ 'mi kial, ƀok Phạm Anh Tuấn – Kơdră Anih jang vei lăng kon pơlei dêh char Gia Lai, Kơdră Anih pơgơ̆r jang tơ̆ tơring, hlôi pơtơm tơdrong jang tơjră hăm 'mi kial tơ̆ 58 xah, phương lơ̆m tơring teh Gia Lai Đông (dêh char Bình Định so). Trong pơkăp jang drơ̆ng minh đơ̆ng dêh char 'noh vei sơđơ̆ng tơdrong hơrih ăn kon pơlei mă hơdrol hloh; ưh gơh lê̆ kon pơlei oei tơ̆ tơring hli hlơt. Rim tơdrong răm đei ƀôh kơyuơ pơhơi, bơngai chĕp kơ̆l tơ̆ tơring athei pŭ tôm tơdrong kơtă hloi.

Sơnăm ‘nâu, kon pơlei tơ̆ tơring đak dơsĭ Khánh Hòa ưh đei pơhơi jơhngâm kiơ. Hlŏh 42.000 hơdrao rong ka hăm rơbâu ‘nu bơngai jang tơ̆ ving Vân Phong păng tơring đak dơsĭ Nha Trang hlôi đei nơ̆r athei tŏk oei tơ̆ kông.

Lơ unh hnam chô̆, tơjră hơmet hnam kơpal hơdrao rong ka hăm tơlei kap, hơmet kơjăp kang kưt, ƀât lăp tơmôch lê̆ hloi 1 păh hơdrao rong vă da ƀiơ̆ hiong răm đơ̆ng đak pŏh yă. Tơ̆ 6 tơnok ka păng anih ƀa to dơ̆ng tơter đak dơsĭ, dang 5.000 tŏ ƀato jang ka hlôi mât dơ̆ng sơđơ̆ng ‘lơ̆ng.