Akŏm đĭ đăng jên vă man 7 tŏ hnam trưng âu ‘nŏh 1.516 ti, man ‘nao 212 lăm hŏk păng dôm anih jang, anih ki thuơ̆t. Dôm anih âu gô pơm ‘lơ̆ng ăn tơdrong hŏk pơhrăm kơ hlŏh 7000 ‘nu hŏk tro tơ̆ tơring sơlam Gia Lai, mă lơ ‘nŏh jĭ hŏk tro bơngai kon kông.

Pơma tơ̆ jơ pơm lêh, Phó Thủ tướng Hồ Quốc Dũng pơma hơdăh: Tơdrong jang ‘nâu tôch gĭt kăl hăm tơring sơlam, tơgŭm tưk tơiung khul bơngai jang, hơmet kơjăp tơdrong mât 1 ƀơ̆r đon păng vei kơjăp tơdrong sơđơ̆ng teh đak. Phó Thủ tướng Hồ Quốc Dũng athei dêh char Gia Lai hơmet mă hơlen, vei lăng păng pơgơ̆r ming man mă ‘lơ̆ng, trŏ năr hơgăt. Atŭm hăm ‘nŏh, athei Anih tơm vei lăng pơtho pơhrăm jăh tơlĕch trong tơgŭm ăn hŏk tro kon kông, mă loi ‘nŏh dôm tơdrong tơgŭm ƀơm truh tơdrong oei xa, yak vih vât păng hŏk pơhrăm.

Kŭm lơ̆m ‘năr âu mơ̆n (16/11), Anih vei lăng kon pơlei dêh char Quảng Ngãi pơgơ̆r Lêh tơlĕch jang ming man 4 Hnam trưng teh đak rong jăl 1 - jăl 2 tơ̆ dôm xăh sơlam Dục Nông, Sa Loong, Rờ Kơi păng Mô Rai. 

Pơma tơ̆ lêh tơlĕch jang, Phŏ Thủ tướng Nguyễn Hòa Bình pơma hơdăh, dôm tơdrong jang ưh khan lăp jing hơnih hŏk pơhrăm đơ̆ng hŏk tro đĕch mă oei tơƀôh ăn đon lui, đon hơdrin yak tŏk păng tơdrong tơgoăt tơgoăl đơ̆ng tơring tơmăn păng tơring groi kông, đơ̆ng kon pơlei lơ̆m teh đak hăm kon pơlei tơring sơlam. Tơdrong tơlĕch jang dôm hnam trưng hŏk 2 jăl tơ̆ tơring sơlam dêh char Quảng Ngãi jing tơdrong ‘lơ̆ng gĭt kăl, tơƀôh hơnăp jang đơ̆ng Đảng, Teh đak hăm tơdrong jang pơtho pơhrăm păng kon pơlei tơring hơtăih hơtŏ, tơring sơlam.