Hnam trưng jăl mônh – jăl ƀar Sa Loong, xăh Sa Loong, dêh char Quảng Ngãi dang ei đei 36 lăm, hăm hlŏh 1.100 ‘nu hŏk tro, lơ̆m noh đei 90% ‘nŏh jĭ kon hơ ‘lơ̆p bơngai kon kông nhen Xơ Đăng, Ca Dong, Jeh Triêng, Bahnar, Brâu, Rađe, Mường, Tày… Sơnăm hŏk truh, hnam trưng gô tŏk truh 40 lăm, hăm dang 1.250 ‘nu hŏk tro. Hnam trưng jăl mônh – Jăl ƀar Sa Loong đei rơih man jing Hnam trưng teh đak rong, pơyoa ăn kon mon lơ̆m xăh. ‘Nâu jĭ trong jang tih, tơgŭm ăn hŏk tro tơ̆ tơring sơlam đei tơdrong ‘lơ̆ng vă hŏk pơhrăm.

Ƀok Nguyễn Hữu Phượng, Hiê̆u trơng Hnam trưng jăl mônh – jăl ƀar Sa Loong tơroi, dang ei hnam trưng đei 70 ‘nu kăn ƀô̆, thây kô, bơngai jang. Hnam trưng pơgơ̆r pơtho 2 vât 1 năr lơ̆m lơ sơnăm âu ki mă lei tam mă kĕ pơgơ̆r ăn hŏk tro sŏng xa, tep pơdơ̆h ‘năr dơ̆ng tơ̆ hnam trưng. Hnam trưng oei jang hơdoi hăm Anih vei lăng kon pơlei xăh Sa Loong păng dôm anih jang kơpal đei ƀơm truh pơih xă teh vă pơyoa ăn tơdrong man hnam trưng teh đak rong kiơ̆ tơdrong hơgăt đơ̆ng Anih tơm vei lăng pơtho pơhrăm, hăm tĕh vă man iĕ hlŏh ‘nŏh 5 ha. 

“Đơ̆ng rŏng kơ đei nơ̆r roi tơbăt, đơ̆ng ‘năr 3/11/2025 vă tơlĕch jang kơna dôm anih jang kơpal oei hơmet ming păng tơlĕch tơdrong tơchơ̆t vă bơ̆jang trŏ trong. Dang ei lăm hŏk kơ đe mon oei tôm; tơdrong ming man gô đei man tơ̆ teh ‘nao chĕng hơmet, ưh đei ƀơm truh tơdrong hŏk pơhrăm kơ đe hŏk tro. Rim bơngai hơpơi ‘mĕh trong jang jăh đei bơ̆ jang hrôih vă kon pơlei đei xa yoa tơdrong tơgŭm đơ̆ng teh đak ‘măn ăn tơring sơlam”.

Kiơ̆ ƀok Nguyễn Ngọc Thái, Kơdră Anih vei lăng pơtho pơhrăm dêh char Quảng Ngãi, bơ̆ jang kiơ̆ trong jang đơ̆ng Khul kơdră teh đak, dêh char Quảng Ngãi man 9 tŏ hnam trưng jăl mônh păng jăl ƀar teh đak rong tơ̆ 9 xăh sơlam kơ dêh char. Lơ̆m jăl 1 (sơnăm 2025), dêh char vă man tơ̆ 4 xăh đei Dục Nông, Sa Loong, Rờ Kơi păng Mô Rai; akŏm đĭ đăng jên man hlŏh 1.000 ti. Ƀok Nguyễn Ngọc Thái ăn tơbăt dơ̆ng, lơ̆m sơnăm 2025, Khul kơdră teh đak ƀơk ăn dêh char 117 ti, oei đei ‘nŏh vă tơlĕch lơ̆m sơnăm 2026: “Tơdrong hrei ‘nâu oei tơhlăk mă lei đĭ đăng anih jang kơpal tơtă tơgŭm ngăl. Pơma atŭm teh tơ̆ xăh đĭ bơih mă lei teh chĕng song ăn anih pơtho pơhrăm ‘nŏh tam mă chĕng. Kơna dang ei athei hơmet ming, chĕng hơmet teh thoi yơ vă gơ̆h ƀơk teh, pơgơ̆r man hnam trưng lơ̆m khei ‘năr hrôih hlŏh”.

Dêh char Lâm Đồng đei 5 xăh sơlam tơ̆ kông ‘nŏh Tuy Đức, Quảng Trực, Thuận Hạnh, Thuận An păng Đắk Wil. 5 xăh âu dang ei đei 47 anih pơtho pơhrăm hăm 39 hnam trưng teh đak pơjing, 5 hnam trưng đơ̆ng kon pơlei pơjing. Lơ̆m noh lăp đei 1 hnam trưng teh đak rong hŏk tro kon kông đĕch. Bơ̆ jang kiơ̆ nơ̆r pơtho đơ̆ng Anih vei lăng kon pơlei dêh char, Anih vei lăng pơtho pơhrăm Lâm Đồng oei jang hơdoi hăm dôm anih jang kơpal păng khul kơdră pơgơ̆r 5 xăh, tơlĕch tơdrong jang ăn 1 xăh 1 hnam trưng teh đak rong.

Kiơ̆ yă Lê Thị Bích Liên – Kơdră Anih vei lăng pơtho pơhrăm dêh char Lâm Đồng, hlôi đei 2 tơring sơlam, ‘nŏh xăh Thuận An păng Quảng Trực oei hơmet tôm tơdrong vă tơlĕch man hnam trưng kơtă lơ̆m sơnăm 2025 âu hloi. 1 Hnam trưng đei 30 lăm, gơ̆h pơtho ăn dang 1.000 ‘nu hŏk tro. Yă Lê Thị Bích Liên hơiă, dôm hnam trưng âu đei hơmĕng gô tơgŭm ăn hŏk tro tơ̆ tơring sơlam đei anih oei xa, hŏk pơhrăm sơđơ̆ng ‘lơ̆ng, vang tơgop atŏk tơiung khul bơngai jang păng hơmet kơjăp tơdrong sơđơ̆ng teh đak tơ̆ tơring sơlam.

“Tơ̆ xăh Quảng Trực păng xăh Thuận An đei Anih tơm vei lăng pơtho pơhrăm chih lơ̆m hơnăn vă tơlech jên man hăm kơsô̆ jên 114 ti păng athei jăh man adrol kơ ‘năr 19/12/2025. Truh dang ei, xăh Thuận An hlôi đei tôm tơdrong kăl păng Anih vei lăng tơdrong jang 3 oei pơm hla ar vă ră roi tơbăt, adrin ƀât hơtuch khei 10 âu pơm đang păng ƀât blŭng khei 11 ‘nŏh tơlĕch jang. Oei xăh Quảng Trực ‘nŏh tŏk bŏk chưk pơ ‘ngoăih teh adrin truh ƀât hơtuch khei 12 kơnh tơlĕch jang”.

Bơ̆jang kiơ̆ trong jang đơ̆ng Anih tơm Chinh trĭ găh man hnam trưng ăn dôm xăh sơlam, lơ̆m sơnăm ‘nâu, Đắk Lắk vă tơlĕch 3 tơdrong jang man Hnam trưng teh đak rong hăm kơsô̆ jên hlŏh 390 ti. Dôm hnam trưng âu đei man tơ̆ 3 xăh sơlam Ia Lốp, Ia Rvê păng Buôn Đôn păng gô đei tơlĕch jang hrơ̆ch ƀât blŭng khei 11 truh âu kơnh.

Bí thư Đảng dêh char Đắk Lắk Lương Nguyễn Minh Triết akhan, Ia Lốp jĭ 1 lơ̆m 7 xăh ưh đei tơmât hơdai kơ dêh char, oei tơ̆ tơring sơlam kơna đei hloi tơdrong ‘lơ̆ng, đei hloi tơdrong nol pơmat tat yoa tơring teh xă, kon pơlei kơtuei, kơsô̆ unh hnam tơnuh păng vă jê̆ tơnuh ‘nŏh oei tôch lơ. Bí thư Đảng dêh char athei tơring băt hơdăh dôm tơdrong ‘lơ̆ng, hơmet ming dôm tơdrong tam mă pran, tơplih ‘nao đon tơchĕng vă gơ̆h jang tŏk pran kơjăp lơ̆m chăl ‘nao.

“Kŭm jĭ kon bơngai ‘nŏh, xăh ‘nŏh ‘năi mă lei tơdrong ‘nao đei sư pha, tơdrong athei jang dang ei roi lơ, tơdrong jang adrol ki tơ̆ xăh so lăp đei 197 tơdrong đech, dang ei tŏk truh 1065 tơdrong jang. Kơna athei hơmet ming anih dơ̆ng, bưng ai đơ̆ng kơdih đơ̆ng noh chih hơmet dơ̆ng tơdrong jang, trong pơgơ̆r jang, trong vă jang păng đon tơchĕng đơ̆ng kơdih. Đon tơchĕng athei mă tôm, đon tơchĕng athei truh jơ̆p teh đak, mưh bơ̆ jang ‘nŏh kiơ̆ tơring, thoi noh iĕm gơ̆h jang đei tơdrong athei tơplih ‘nao dang ei.”