Tơchĕng ‘lơ̆ng đon kơchăng đơ̆ng kon pơlei păng tơdrong adrin đơ̆ng khul jang dŏng tơgŭm, Phó Thủ tướng akhan, dêh char Khánh Hòa hlôi akŏm tôch ai khul jang, lơ̆m noh Anih chĕp kơ̆l Khul linh tơring 4 Khul linh đak dơsĭ iŏk ca nô prăt măng năm chơ kon pơlei lĕch đơ̆ng tơring krê hơmơt. Khul linh ƀô đô̆i, công an păng linh đăk kŏng tơ̆ đak đei pơgơ̆r năm truh tơ̆ dôm xăh oei đei đak lơ̆p, ưh gơ̆h yak vih vât.

Mă đơ̆ng đak tơ̆ 1,2 tơring đĭ vă hrơ̆ ƀiơ̆ bơih ră, mă lei đak lip oei tôch hơmơt, oei hơnơ̆ng đei ‘mi, lơ trong đak lơ̆p mă ưh ‘nŏh teh hơlih. Phó Thủ tướng athei kon pơlei hơnơ̆ng oei xa tơ̆ anih veh ver kơ đak lip, ưh gơ̆h brŏk tơ̆ hnam mưh tam mă đei nơ̆r asong đơ̆ng Khul kơdră tơring.

 Truh kơsơ̆ măng năr 20/11 'mi gah tơring hlĕch – pơbah tŏk bŏk păng Tây Nguyên da ƀiơ̆ bơih. Tơring 'mi lơ hloh noh kơpal 350mm, tơjur tong hơnê̆ pơtêng hăm 'mi dơnơm ah năr 19/11. Hnam kơmăi unh hơyuh Sông Ba Hạ adoi tơjur pơchoh đak păng đak tơ̆ dôm đak krong tơ̆ Gia Lai, Đăk Lăk adoi hrŏ ƀiơ̆. Jăl trong 29 pơtoi Pơmơ̆t păng Hơlĕch Đăk Lăk đei asong kơdou păng lơ gre chơ tơmam tơgŭm đei tơmam xa, pơgang, tơmam drăm kăl năm truh tơring Hơlĕch tơgŭm ăn kon pơlei tơring đak hơbông.  Tơdrong tơroi hơdah đơ̆ng 'mi kial kơsô̆ 3 'năr ou, hlôi jur oei pă pơkăp 1 lơ̆m 2 năr truh. Tơ̆ dêh char Lâm Đồng, anih đei đak hơbông kơtang lơ̆m tŏ sĕt tơring iĕ hloh, mă lơ noh dôm xah D’Dral, Đơn Dương… tơring klŭng kơ Hnam kơmăi unh hơyuh Đa Nhim, adoi da ƀiơ̆ kơ hli hlơt. 1500 'nu kon pơlei hlôi đei 'nhăk truh anih oei sơđơ̆ng. Đơ̆ng rŏng kơ đak hrŏ, kon pơlei păng jơnŭm pơgơ̆r tơring tŏk bŏk akŏm hơmet răm. Tơdrong jang tơgŭm dŏng tơ̆ tơring đak hơbông gah hơlĕch – Pơbah tŏk bŏk păng Tây Nguyên adoi oei hăt hot păng oei lơ tơdrong tơnap tap.

Tơ̆ Lâm Đồng, yoa tơdrong pơchoh đak đơ̆ng Công ty Hnam kơmăy unh điên Đa Nhim – Hàm Thuận – Đa Mi kiơ̆ dơnâu đak blai Đơn Dương tŏk hơnơ̆ng lơ̆m gơmăng ‘năr 19/11, đei jơ pơchoh truh 2.580 m³/s, dôm xăh tơ̆ pơbăh đak krong Đa Nhim – lơ̆m noh đei xăh D’ran – đak lơ̆p đĭ. Dêh char krao akŏm khul linh, mong tơmam vă chông tơlĕch hlŏh 1.500 ‘nu bơngai tơ̆ xăh D’ran tŏk oei tơ̆ tơring sơđơ̆ng.

Kiơ̆ kơsô̆ chih jô̆ blŭng a, đei vă jê̆ 750 tŏ hnam đak lơ̆p, hiong răm tôch dêh; 5 tŏ hnam păk; dang 1.320 ha ‘nhot, ƀum hơƀo hiong răm. ‘Mih tih oei pơm ăn lơ anih teh hlŭn, hơlih tơ̆ dôm trong gre kơ dêh char. ‘Ngoăih kơ anih teh hơlih tơ̆ krang Mimosa – găh Trong gre 20 – pơm ăn gre ưh gơ̆h kơdâu vih vât, lơ trong gre tơ̆ tơring tơrang kŭm hư pơchăh ‘năi. Trong gre đơ̆ng xăh Đan Phượng năm tơ̆ xăh Tân Thanh (dang ei găh xăh Tân Hà – Lâm Hà) đei teh hơlih, chĭt găn trong. Kơdră chĕp kơ̆l dêh char Lâm Đồng athei khul kơdră pơgơ̆r dôm xăh păng khul jang kơpal hơnơ̆ng chông tơlĕch kon pơlei đơ̆ng tơring krê hơmơt, pơm anih oei xa pơgia sơđơ̆ng ‘lơ̆ng, ‘măn măh mai tơmam xa, đak nhă, khăn kơmŭng păng tơmam yoa kăl.