VOV4.Bahnar - Dôm năr au, tơ̆ 7 tơring sơlam tĕh đak kơ dêh char Dak Nông tŏk bŏk pơgơ̆r Năr lêh Đĭ đăng kon pơlei vang vei lăng sơlam tĕh đak sơnăm 2022, hơvơn kơdrơ̆m kon pơlei rim hơdrung lơ̆m dêh char vang năm.

Tơ̆ “năr lêh” atŭm hăm tơdrong pơgơ̆r jŏh ayŏ kơdŏ soang ‘lơ̆ng hơ iă hơdrĕch hơdrung, rim bơngai tang măt hlôi tơbăt hơdăh trong bơ̆ jang ‘lơ̆ng lơ̆m jang kiơ̆ rim trong jang pơting dĭh băl tơ̆ tơring nhen “ Tơdrong jang kon pơlei vang vei lăng trong sơlam tĕh đak, hơdrơ̆ng sơlam tĕh đak păng vei lăng năng tông sơđơ̆ng dơ̆ng kơ jăp pơlei pơla tơring sơlam tĕh đak”; Tơdrong jang pơting dĭh băl “Pơđĭ lơ̆m tĕh đak vang kơrŭn jơhngơ̆m kơ yuơ bơngai dơnŭh, ư̆h kơ lê̆ đei bơngai bu hơchăng tơ̆ rŏng”; păng rim tơdrong jang “Ba ŏh năm tơ̆ hnam trương”, “kon mŏm kơđông ƀô̆ đô̆i vei lăng sơlam tĕh đak”, “Yak hơdoi hăm drŏ kăn tơring sơlam tĕh đak” ... Lơ̆m năr lêh pơđĭ kon pơlei vang vei lăng sơlam tĕh đak tơ̆ tơring Thuận An, Khŭl kơdră chĕp pơgơ̆r Dơnŏ anĭh Ƀô̆ đô̆i vei lăng sơlam tĕh đak dêh char Dak Nông hlôi pôk ăn Kỷ niệm chương “Kơ yuơ tơdrong pơm tơm vei lăng sơđơ̆ng tơring sơlam tĕh đak” đơ̆ng Khŭl kơdră chĕp pơgơ̆r Dơnŏ anĭh tơm Ƀô̆ đô̆i vei lăng sơlam tĕh đak pôk ăn 1 ‘nu bơngai hlôi đei lơ tơdrong tơgop lơ̆m bơ̆ jang vei lăng năng tông pơm tơngla, vei lăng sơđơ̆ng tơring sơlam Tĕh đak.

Tơblơ̆ nơ̆r: Amazưt