VOV4.Bahnar - Năr 26/9, Ƀok Lê Minh Hoan, Kơdră chĕp pơgơ̆r Dơnŏ anĭh tơm vei lăng Chŏh jang sa păng Atŏk tơ iung tơring tơrang, Kơ iĕng Kơdră chĕp pơgơ̆r Dơnŏ anĭh Bơ̆ jang pơrô̆ jang Tĕh đak găh tang găn tŏ ‘mi kial pơrăm atŭm hăm Khŭl bơ̆ jang hlôi năm dăr lăng bơ̆ jang tang găn kial hơbŭt kơsŏ 4 tơ̆ dêh char Quảng Ngãi păng dăr lăng tơdrong sơđơ̆ng Dơnau đak Phú Ninh, dêh char Quảng Nam.

Ƀok Lê Minh Hoan dăr lăng bơ̆ jang tang găn hơlau kial hơbŭt kơsô̆ 4 tơ̆  Quảng Nam

Ƀok Lê Minh Hoan hlôi năm dăr lăng pơnơ̆ tang găn tĕh tơdrŭt hơlĭh Cửa Đại, pơlei tơm Hội An, tdêh char Quảng Nam păng mơ̆ng tơroi tơbăt bơ̆ jang tang găn kial hơbŭt đơ̆ng dêh char Quảng Nam.  Ƀok Lê Minh Hoan hôn bơnê tơdrong tơlĕch jang ‘lơ̆ng tang găn hơlau đơ̆ng rim dêh char Quảng Nam, Quảng Ngãi. Kiơ̆ đơ̆ng Kơdră dơnơm, rim dêh char au jei đei ƀar tơring kăl iung jang tang găn kial hơbŭt, ‘nŏh găh đak dơsĭ kăl chă jô̆ hơlen rim duk, sơlăh yông kon pơlei rôp ka hơdang năm oei tơ̆ hơnĭh sơđơ̆ng; găh tơ̆ tơring groi kông kăl pơmet hơdrol dôm trong jang tang găn hơlau hăm đak kroong hơbong thong đak tŏk blai, tơdrŭt hơlĭh kông.

Kŭm hăm tơ ring Tŏk bŏk, dôm dêh char lơ̆m tơ ring Tây Nguyên kŭm hlôi tơ lĕch lơ trong jang tơ jră hăm ‘mi kial hơ bŭt kơ sô̆ 4. Kơ sơ̆ ‘năr 26/9, Khŭl chĕp kơ̆l Anih jang Đảng dêh char Kon Tum pơ gơ̆r hop akŏm hăt hot trực tuyến hăm kơ dră đảng, kơ dră chĕp kơ̆l đơ̆ng dêh char truh tơ̆ xăh vă drơ̆ng 1 nơ̆r tơ drong jang chĕp kơ̆l, pơ gơ̆r jang tang găn, tơ jră hăm ‘mi kial hơ bŭt. Kiơ̆ kơ ‘noh, Khŭl chĕp kơ̆l Anih jang Đảng dêh char hlôi drơ̆ng nơ̆r găh athei đơ̆ng Anih vei lăng pơ tho pơ hrăm ăn hŏk tro pơ dơh kơ hŏk đơ̆ng ‘năr 27/9 truh ding đei tơ roi tơ băt ‘nao.

Kon Tum hop akŏm hăt hot tang găn, tơ jră hăm ‘mi kial kơ sô̆ 4

Anih vei lăng kon pơ lei dêh char Kon Tum hlôi pơ jing 3 khŭl bơ̆ jang kiơ̆ hơ len lăng, pơ gơ̆r tang găn ‘mi kial hơ bŭt tơ̆ dôm apŭng đei hơ mơt ƀơm ưh kơ ‘lơ̆ng kơ tang, ‘noh: Kon Plông, Kon Rẫy, Ngọc Hồi, Đăk Tô, Đăk Hà, Tu Mơ Rông păng Đăk Glei. Khŭl chĕp kơ̆l Anih jang Đảng dêh char Kon Tum athei rim kơ dră đảng, kơ dră chĕp kơ̆l đơ̆ng dêh char truh tơ̆ tơ ring athei yông kon pơ lei lĕch đơ̆ng dôm tơ ring đei hơ mơt kơ teh hơ lih, đak lŏk jroh; hơ drin ưh kơ lê̆ kon pơ lei năm klĕch dôm tơ ring krê hơ mơt lơ̆m jơ năr đei ‘mi đak tih.

VOV.vn

Tơblơ̆ nơ̆r: Amazưt - Thuem