‘Măng ‘mi tih đak lơ̆p tôch kơ dêh âu ki hlôi lơ̆p đĭ 34 xăh, phường kơ dêh char Đắk Lắk, lơ̆m noh pŭ hiong răm dêh hloh ‘noh dôm tơring Đông Hòa, Hòa Xuân, Hòa Thịnh, Hòa Mỹ… Ƀơ̆t đak ‘nao och, kon pơlei kŭm hăm khŭl lĭnh ƀô̆ đô̆i, kŏng an, khŭl grŭp tơring tơtĕnh vang jang hơmet, kôch dơ̆k teh, pruih pơgang, dônh akŏm râm rĕk, hơmet ming oei sa, vă jăh sơđơ̆ng tơdrong hơrih sa. Chĭh jô̆ ‘nao hloh đơ̆ng Anih vei lăng kon pơlei dêh char tơbăt, lơ̆m dêh char đei 55 ‘nu lôch, 10 ‘nu hiong dong, hloh 150.000 tŏ hnam đei păk hơlih, hloh 120 tŏ hnam đei păk dăh mă hư răm pơđĭ; akŏm hiong răm jô̆ pơhlom hloh 5.500 ti hlak jên.

Bí thư Anih jang Đảng dêh char Lương Nguyễn Minh Triết pơma hơdăh, đak đĭ och đĭ tơ̆ tơring păih Hơlĕch, Anih jang Đảng dêh char athei rim khŭl lĭnh tơtĕnh tơgŭm kon pơlei, jang hơdai vei lăng tơdrong jang chă năm tơgŭm ‘mêm mơnat, hơdai hăm hơmet rơgoh cham char, mă loi ‘noh jĭ tơ̆ hnam trưng hŏk, hnam pơgang xăh, phường vă jăh pơvih ăn kon pơlei hơlơ̆k dơ̆ng.

 Kơsơ̆ 23/11, tơ̆ Tơnŏk Quy Nhơn, dôm jĭt ‘nu kăn ƀô̆, linh găh Khul linh vei lăng tơring sơlam tơ̆ đak dơsĭ 2 păng Kơđông linh vei lăng ‘măng jang sơlam tơnŏk duk Quy Nhơn hăt hiŏng pơdŭ 120 tân phe yoa Anih ‘măn răk kơ teh đak ƀơk tơgŭm ăn kon pơlei Gia Lai pŭ răm đơ̆ng ‘mi tih đak lơ̆p. Hơdai lơ̆m năr, tơ̆ xăh Ngô Mây păng Cát Khánh, 20 ‘nu kăn ƀô̆, linh tơ̆ Kơđông linh vei lăng tơring sơlam Cát Khánh jang hơdoi hăm khul kơdră tơring chơ chuĕn, ƀơk tơmam đơ̆ng 15 tŏ gre chơ tơmam yoa kăl ăn dôm pơlei Chánh Hữu, Chánh Định, Chánh Hội păng Vân Trim, vang tơgŭm tơtom păng trŏ bơngai.

Lơ̆m ‘măng ‘mi tih đak lơ̆p âu ki, dôm jĭt rơbâu ‘nu kăn ƀô̆, linh găh Quân khu 5, Quân đoàn 34 păng Anih chĕp kơ̆l pơgơ̆r khul linh dêh char Gia Lai vang krao akŏm khul linh, gre, tơmam vang bơ̆ jang hơdoi hăm công an, khul kơdră tơring pơgơ̆r dŏng tơgŭm, chông tơlĕch kơhrĕng rơbâu ‘nu bơngai đơ̆ng tơring krê hơmơt, dŏng tơgŭm ăn rơbâu ‘nu bơngai ƀât đei ‘mi tih, đak lip tôch hơmơt âu ki.

Kơmăng 23/11, khŭl lĭnh kon pơlei xăh D’Ran, dêh char Lâm Đồng hơnơ̆ng tơgŭm kon pơlei năm truh tơ̆ hơnih oei sơđơ̆ng, hơdai hăm chơ mŭk tơmam lĕch đơ̆ng tơring đei hơmơt teh hơlih lơ. Hơdrol ‘noh, dang 3jơ kơsơ̆ lơ̆m năr, khŭl kơdră chĕp kơ̆l xăh D’Ran chă ƀôh tơ̆ groi Ba Lá Xanh, plei Lạc Thiện 2 đei ƀôh hơđang kơ jung hloh 300 m, să 20–50 cm, đei hơnih tơdrŭt vă jê̆ 1 met rok tơ ter jih kông, đei ƀôh hơmơt hơlih tih.

Hơdai ‘noh, jih taluy păih rŏng 2 tŏ hơnih hnam kon pơlei hơnơ̆ng hơlih, pơm ăn dôm jĭt khô̆i teh tơmo blai tơ̆ hơnih hơrih sa. Lăp đơ̆ng rŏng iŏk đei roi tơbăt, khŭl kơdră chĕp kơ̆l krao hơvơn dôm jĭt ŭnh hnam kon pơlei tơ̆ hơla jih groi yông hăt hŏt, hơmet ăn hơnih oei pơgia sơđơ̆ng. Khŭl lĭnh kon pơlei, kŏng an, khŭl grŭp tơring đei hơvơn tơgŭm chơ tơmam, gre vă tơ jur ƀiơ̆ hiong răm păng vei sơđơ̆ng hơkâu jăn.