Jang kiơ̆ nơ̆r athei đơ̆ng Thủ tướng teh đek găh “500 măng năr bơ̆ jang ming man 3.000 km trong gre kơdâu hrĕnh” đơ̆ng tŏk bŏk khei 8/2024, dôm anih iŏk jang pơm trong gre kơdâu hrĕnh Khánh Hòa – Buôn Ma Thuột hlôi akŏm kơhrĕng ‘nu ki sư, công nhân păng gre, kơmăy kơmŏk bơ̆ jang “3 ka, 4 kip” hơnơ̆ng.

Tơdrong jang pơm trong kơjung 117,5 km, xă 4 tŏ gre kơdâu hơdai, akŏm đĭ đăng jên jang vă jê̆ 2.000 ti, adrin jang đang ƀât hơtuch sơnăm 2026 păng tơmât yoa đơ̆ng blŭng sơnăm 2027. Truh dang ei, 2 tŏ trong trôm tơtil băl kơjung hlŏh 1.700m tơ̆ trong gre kơdâu hrĕnh tơƀưh 2 dêh char Khánh Hòa păng Đắk Lắk hlôi đei bŏk klĕch, lơ̆m noh trong trôm păih ‘ma jang đei 82% tơdrong ming man. Đon jang tơnăp, adrin tôch pơneh hlôi tơƀôh hơdăh đon pơhnŏng đơ̆ng tơ ‘ngla tơmât jên jang păng dôm anih ming man vă bơ̆ jang đei đon pơhnŏng atŏk tơiung trong nơnăm gĭt kăl ăn teh đak.