VOV4.Băhnar - Pơgê năr 7/4, tơ̆ Hà Nội, Hơnĭh chĭh kơtơ̆ng ang Jang Jên hu Tĕh đak Việt Nam hăm Tạp chí Bơngai tơmơ̆t jên jang hlôi vang pơgơ̆r Hop akŏm “Pơma dơnŭh trong jang jên hu tơgŭm ăn Tơdrong jang hơmet ming, atŏk tơ iung mŭk drăm-tơpôl”. Jang kiơ̆ Tơdrong tơchơ̆t 11 sơnăm 2022 kơ Khŭl kơdră Tĕh đak găh Tơdrong jang hơmet ming, atŏk tơ iung Mŭk drăm-Tơpôl, Dơnŏ anĭh tơm jang jên hu hlôi hơdrin chă tơchĕng, tơ iung pơjing păng pơtrŭh ăn kơdră kơpal pơjing lơ trong jang tơgum git kăl, vă tơgŭm djru kon pơlei păng hơnĭh mơdro sa. Mĭnh ƀar trong jang Jên hu bơ̆ jang tĕh đak, nhen ư̆h kơ thuê̆, tơjur thuê̆, hlôi ƀlep hăm tơdrong erĭh sa păng đei kon pơlei lăp đon hôn bơnê. Dôm tơdrong tơgŭm djru gĭt kăl au hlôi tơgop gĭt kăl vă hơnĭh mơdro sa păng tơdrong jang mŭk drăm hơmet pơ ‘lơ̆ng lơ̆m jăl blŭng sơnăm au. Tơ̆ hop akŏm, tang măt ăn Hơnĭh tơm Thuê̆ păng Hơnĭh tơm jang vei lăng Tĕch răt hăm tĕh đak đe hlôi tơbăt hơdăh mĭnh ƀar trong jang kăl tơgŭm djru hơnĭh mơdro sa lơ̆m khei năr kơnh, mă kăl găh hơmet pơ ‘lơ̆ng bơ̆ jang jên hu, jang kiơ̆ kmăi kmŏk kơsô̆, atŏk tơ iung thuê̆ păng pơm hla bơar tơchơ̆t kiơ̆ lơ̆m điên tư.

Tơblơ̆ nơ̆r: Amazưt