Khŭl kơdră chĕp pơgơ̆r păng kon pơlei Đắk Lắk hơmŏ rim trong bơ̆ jang, trong tơgŭm djru gĭt kăl au gô jing tơdrong rơvơn tĭh tên, trong jang tơgŭm ăn, pơtrŭt kơtang tơring hrôih iung jang iŏk đei jing hơnĭh tơm tơring kơdrơ̆m Tây Nguyên kiơ̆ Tơdrong tơchơ̆t 67 đơ̆ng Dơnŏ anĭh tơm Chĭnh trĭ.

Kiơ̆ đơ̆ng Dơnŏ anĭh vei lăng Jŏh ayŏ kơdŏ soang đă ƀŏng lŏng tơplŏng kơdau Tơmang pơ hiơ̆ Đắk Lắk: Tơdrong tơchơ̆t đei pơdrơ̆ng kiơ̆ atŭm hăm rim tơdrong pơkăp jang pơlong năng mĭnh ƀar trong bơ̆ jang, tơdrong tơgŭm djru gĭt kăl hăm pơlei tơm Buôn Ma Thuột, dêh char Đắk Lắk găh vei lăng jên hu, kon jên bơ̆ jang tĕh đak; klăh asong trong chĕp pơgơ̆r tĕh đak lơ̆m bơ̆ jang pơprŏ jang; tơgŭm djru hơvơn tơmơ̆t jên jang; tơgŭm djru hăm dôm bơngai joăt jang, bơngai khoa hŏk păng dôm bơngai gơ̆h hơgei. Atŭm lơ̆m năr, kơtă tơ̆ hop akŏm hăt hot joăt joe khei 10 kơ Dơnŏ anĭh vei lăng kon pơlei dêh char Đắk Lắk, ƀok Phạm Ngọc Nghị, Kơdră chĕp pơgơ̆r Dơnŏ anĭh vei lăng kon pơlei dêh char hlôi athei rim hơnĭh bơ̆ jang, tơring tơrang hơlen lăng jang kiơ̆ hloi rim trong jang gĭt kăl ‘nao đei Kuô̆k hô̆i pơdrơ̆ng kiơ̆ vă pơlei tơm hrôih iung jang kiơ̆ trong bơ̆ jang, tơdrong jang vei lăng tĕh đak păng khŭl kơdră chĕp pơgơ̆r tơring kơdrơ̆m, bơ̆ jang tơgŭm ăn kon pơlei ‘lơ̆ng hlŏh dơ̆ng.