Rim khŭl duk ka đơ̆ng Tơnŏk ka Hòn Rớ, phường Nam Nha Trang, dêh char Khánh Hòa yak tơpăt tơ̆ đak dơsĭ tih. ‘Măng năm jang tơ̆ đak dơsĭ năr Tết đei rim ŭnh hnam hơmet ăn ‘lơ̆ng tôm. ‘Ngoăih kơ đak dâu đak xăng, phe, tơmam sa, đak ‘ngam, oei đei dơ̆ng ƀĕng mư̆t, plei ‘long păng dôm kơ chŏu pơkao vạn thọ hơnhăk ƀa pơyan puih mak đơ̆ng kông lĕch tơ̆ tŏk bŏk đak dơsĭ. Tơdrong hơiă Têt kiơ̆ dôm duk năm tơ̆ đak dơsĭ. Tơ̆ lơ̆m duk, kơmâu dreng pơkao vạn thọ ƀrŭng tŏk bŏk kơmâu jơk đak dơsĭ; lơ̆m kơthŭng duk ‘noh ƀĕng chư̆ng, ƀum kơtĭm ‘iŭ, hla ƀey ‘iŭ... đei nŭng pơ ‘lơ̆ng. Kơmăy re hơdai hăm nơ̆r thơ thou sơnăm ‘nao hrôih đơ̆ng buăl hao thŏng nan pơm jing tơdrong hơiă puih mak tôch kơ hơdrô̆ tơ̆ hơnih đak dơsĭ. Yă Huỳnh Thị Hương, phường Hoài Nhơn, dêh char Gia Lai tơroi:

“Tơmam răt tơ̆ pơlei ngăl, đơ̆ng rŏng ‘noh chĕp ba tơ̆ âu. Têt đei dơ̆ng mư̆t, mơkai vă đe ‘nhŏng oh năm ngôi tơ̆ buăl tơ̆ đak dơsĭ vă sa Têt nhen tơ̆ kông. Đei dơ̆ng dôm kơchŏu pơkao Bông Thọ, 2-3 kơchŏu kơloăi păh lăp, lê̆ tơ̆ hơnăp păng tơ̆ rŏng duk. ‘Nhŏng oh jang sa tơ̆ đak dơsĭ sa Têt tơ̆ đak dơsĭ chơt hơiă ƀiơ̆, dă ƀiơ̆ kơ ƀlŏk tơ̆ hnam ƀiơ̆”.

Tơring đak dơsĭ Trường Sa să sap ‘noh jĭ hơnih jang sa đơ̆ng dôm duk ka Nam Trung Bộ. Dôm năr Têt, dôm duk oei hơnơ̆ng dăng hơ nhoăl, dui rôp yâu ka hăt hot. Lơ̆m duk, ‘nhŏng oh tơplih băl pleh ka, rơih hơmet, hơnhăk tơ̆ hơnih vei lăng. Dôm hơnhoăl klep ƀĕnh kơ ka hơnhăk ƀa hơmĕng ăn 1 sơnăm hiôk ‘lơ̆ng. Kon pơlei jang ka tơgĕch jơ năr blŭng sơnăm, ƀơ̆t ka lơ, vă hơtŏk iŏk yua, ‘mong ăn dôm khei đak dơsĭ tơdrŏ. Ƀok Bùi Văn Hưng, oei tơ̆ phường Nam Nha Trang, dêh char Khánh Hòa tơbăt:

“Chă rôp yâu kiơ̆ tơring đei ka lơ Trường Sa jum dăr dôm achon Đá Đông, Đá Lớn. Mưh vă jê̆ đĭ đak dâu ‘noh pơdơh, sa Têt đang đang ‘năr 7- ‘năr 8 âm ‘mơ̆i vih tơ̆ kông. Năm tơ̆ đak dơsĭ pơyan âu tŏ sĕt thŏng nan năm kơna jang ƀô̆nh ƀiơ̆. Khei ‘noh đei ka kơna dôm sơnăm hơdrol bu năm kŭm đei ka lơ. Khei Têt jang hloh 2 ‘măng kơ dôm khei to, khei hmă lăp 15 triệu, khei Têt gô đei 30-40 triệu hlak jên”.

Tơ̆ rim duk, kơmăy dăr hơlen VMS đei rim bơngai huơ̆r thŏng an vei lăng, hơlen lăng hơnơ̆ng. Kon pơlei jang ka pơm kiơ̆ tơpăt hơnih gơh ăn rôp yâu, ưh chă rôp yâu hloh hơnih tơring đak dơsĭ Việt Nam, jang kiơ̆ tôm tơdrong hơgăt găh tơdrong jang rôp yâu ka glăi, ưh kơ roi tơbăt, ưh kơ kiơ̆ tơdrong hơgăt (IUU). Gơmăng sơng sơnăm ‘nao tŏk bŏk đak dơsĭ, đe sư soh nhang soi kơ yă ƀok, ƀlŏk hơdơ̆r kơ dôm bơngai hlôi hiong tơ̆ tŏk bŏk đak dơsĭ Hơlĕch, thơ thou ăn băl sơnăm ‘nao hiôk sơđơ̆ng đang kơ ‘noh hơnơ̆ng jang dơ̆ng. Ƀok Trần Hoàng, duk ka kơsô̆ 97525-BĐ, xăh Tam Quan Bắc, dêh char Gia Lai, tơbăt, tơdrong sa Têt tơ̆ đak dơsĭ hlôi jing tơdrong joăt. Hloh 30 sơnăm jang tơ̆ đak dơsĭ, sư đei dang 20 ‘măng sơng sơnăm ‘nao tơ̆ tơring đak dơsĭ Trường Sa. Gơmăng sơng sơnăm ‘nao, ‘nhŏng oh pơih rơ jeo pơma dơnuh hăm bơngai tơ̆ kông, dôm duk thơ thou băl sơnăm ‘nao đang kơ ‘noh vang mơ̆ng nơ̆r thơ thou têt đơ̆ng Kơdră teh đak kiơ̆ hơyuh pơre nơ̆r đơ̆ng Radiô nơ̆r pơma Việt Nam. Ƀok Trần Hoàng, tơroi:

“Kinh độ, vĩ độ ĭnh băt, đei trong tơƀôh ngăl bơih, bơ̆n ưh kơ gơh yak hloh dôm trong ‘noh. Oei lơ̆m tơring đak dơsĭ Việt Nam ‘noh rôp yâu ka măk ai đĕch. Gơmăng sơng sơnăm ‘nao tŏk bŏk đak dơsĭ oei sơng Têt, soh nhang nhen lơ̆m ŭnh hnam. Akŏm ‘nhŏng oh thơ thou sơnăm ‘nao, đơ̆ng rŏng kơ sơng sơnăm ‘nao ‘noh hơnơ̆ng năm jang dơ̆ng. Năm jang tơ̆ đak dơsĭ lăp ‘meh ka đei lơ, năm truh hơnih, vih truh trong”.

Tơ̆ kông, Tơnŏk ka Hòn Rớ păng kơchơ ka hơdang Nam Trung Bộ oei bơ̆jang hloi năr Têt, ling lang sơng dôm duk ka vih. Mưh rim ‘măng duk vih, bơngai mơdro hăt hot plơih iŏk, klăih song, rơih hơmet, tăh lơ̆m prĕl, chơ ka năm tĕch; tơdrong chih iŏk tơmam, tơchă băt anih pơm tơlĕch đei bơ̆jang tôm kiơ̆ tơdrong hơgăt IUU. Yă Nguyễn Thị Hòa, bơngai răt iŏk ka tơ̆ Tơnŏk ka Hòn Rớ tơbăt:

“Nhôn ưh kơ đei pơdơh têt, mưh đei thŏng nan vih ‘noh nhôn iŏk tơmam hloi, Hla ar hô sơ chih tôm kiơ̆ pơtho đơ̆ng Khŭl vei lăng Tơnŏk, ưh kơ gơh lê̆ kư̆ kă. Pơtih gia, thŏng an chơ 500 kĭ ‘noh chih ƀlep 500ki”.

Lơ̆m dêh char Khánh Hòa dang ei đei hloh 5.100 tong duk lơ̆m noh hloh 1.400 tong duk kơjung hloh 15m. Năr têt, tơchĕng hơdrol kơhrĕng tong duk hăm rơbâu ‘nu kon pơlei jang ka jang sa tơ̆ tơring đak dơsĭ Trường Sa. Tơdrong jang tơ̆ đak dơsĭ ưh khan lăp hơnhăk ăn tơdrong jang sa đĕch mă oei tơgop vei kơjăp sơđơ̆ng, pơm tơm kơdih tơ̆ đak dơsĭ Biển Đông dơ̆ng. Ƀok Nguyễn Duy Quang, Kơdră Anih vei lăng găh Choh jang sa păng Cham char dêh char Khánh Hòa tơbăt:

“Kon pơlei jang tơ̆ đak dơsĭ ‘noh jĭ trong jang tih đơ̆ng Đảng păng teh đak vă hơtŏk tơiung mŭk drăm đak dơsĭ hơdai hăm vei sơđơ̆ng tơ̆ đak dơsĭ. Hơdai hăm ‘noh, dêh char krao hơvơn kon pơlei bơ̆jang kiơ̆ tơpăt tơdrong hơgăt găh tơdrong jang IUU, hơtŏk tơiung tơdrong jang ka tơnăp hăm teh đak păng tơpôl apŭng plĕnh teh, yak truh kơjăp ‘lơ̆ng”.

Tŏk tŏk đak dơsĭ Trường Sa, dôm tong duk hơdrin jang sa tơ̆ đak dơsĭ. Têt đơ̆ng kon pơlei jang ka ưh khan lăp soh nhang sơng sơnăm ‘nao tŏk bŏk đak dơsĭ dăh mă kơ chŏu pơkao tơ̆ hơnăp kơ̆l duk, mă oei jing đon lui lơ̆m 1 sơnăm ‘nao tôm măh păng hơpơi ‘meh pơm pơdrŏng trŏ ƀlep tơ̆ tơring đak dơsĭ pơlei pơla.