Thủ tướng Phạm Minh Chính hơlen rim hơnih tơm, hơnih jang đei ƀơm truh hlôi tơtom jang kiơ̆ rim nơ̆r pơrô̆ jang đơ̆ng Thủ tướng Teh đak păng iung jang kiơ̆ pơm sơđơ̆ng tĕch mơdro, sơđơ̆ng kơjă đak xăng đak dou lơ̆m khei ‘năr tơblăh vang tơ̆ Trung Đông oei hơnơ̆ng kơtang. Pơma hơdăh ưh kơ gơh kơƀăh đak xăng đak dou mă đơ̆ng đei tơdrong lơ liơ, Thủ tướng athei kăl tơlĕch jang vei lăng kơjă đak xăng đak dou kiơ̆ hơnih tĕch mơdro păng Teh đak pơchoh trong; pơm kiơ̆ trong pơm sơđơ̆ng kơjă ‘lơ̆ng hơ iă, trŏ lăp, jơnei; ưh kơ gơh gơ̆t tơmam drăm, tŏk kơjă păng pơgơ̆m trong jang tơgŭm djru vă iŏk yoa sa hơpăh kơdih, pơm tơsul tơsăl mơdro sa. Thủ tướng pơrô̆ athei rim hơnih tơm, hơnih jang ƀơm truh, lơ̆m ou đei Hơnih tơm Kŏng ang iung jang dăr lăng păng xek tơlang kơhret rim tơdrong pơm glăi tơdăh đei.

Thủ tướng jei athei dăr lăng hơlen păng tơjur rim trong thuê̆ tĕch răt đei ƀơm truh đak xăng đak dou vă tơgŭm djru ăn hơnih mơdro sa păng kon pơlei lơ̆m khei ‘năr hrei ou, pơtruh ăn hơdrol năr 20/3. Lơ̆m khei ‘năr kăl hloh, tơdăh tơdrong tơblăh vang tơ̆ Trung Đông pơdui đunh, kăl dăr lăng, chih akŏm tơroi tơbăt ăn kơdră kơpal lăng hơlen, proh hơmet kon kên jang teh đak vă pơm sơđơ̆ng kơjă đak xăng đak dou.