Tơ̆ jơ hop akŏm, dôm bơngai jang drơ̆ng nơ̆r hăm dôm tơdrong đei tơlĕch, atŭm hăm ‘nŏh pơdrơ̆ng nơ̆r ăn tơdrong Tơchơ̆t hơmet ming, pơjao tơdrong jang ăn 1,2 ‘nu bơngai lơ̆m Khul vei lăng pôk rơih kơ teh đak păng Grŭp jang tơgŭm ăn Khul vei lăng pôk rơih.

Pơma pơtôch hop akŏm, Kơdră Quốc hội athei, ưh kơ lê̆ đei tơdrong glăi mưh pơm hla ar ƀơm truh tơdrong gơ̆h năm pôk rơih, gơ̆h chih măt lĕch pơjei; athei pơgơ̆r mă 'lơ̆ng, gơ̆h hơgei; “jang đơ̆ng hrôih, đơ̆ng hơtăih”, rơđăh bơngai, rơđăh tơdrong jang, rơđăh jơnăr, rơđăh tơdrong jang đei, rơđăh hơnăp jang; hơtŏk tơdrong dăr lăng, vei lăng kơdih; iŏk bơngai tăh hla pơm tơm. Khul vei lăng pôk rơih teh đak jang hơdoi mă 'lơ̆ng đơ̆ng Trung ương truh tơring; hơtŏk hơnăp jang đơ̆ng bơngai chĕp kơ̆l; sek tơlang tơtom dôm tơdrong tơhlăk, dôm tơdrong 'nao đei, mă loi 'nŏh tơ̆ tơring.

Kăl hlŏh dơ̆ng 'nŏh ƀât oei bơ̆ jang kiơ̆ trong Khul kơdră pơgơ̆r tơring 2 tăl, đei lơ xăh 'nao yoa thoi noh, dôm anih jang kơpal athei tơrek truh, pơgơ̆r jang mă 'lơ̆ng. Hơtŏk tơdrong roi tơbăt, jang kơmăy kơmŏk, vei sơđơ̆ng, pơm 'lơ̆ng tơdrong gơ̆h pôk rơih đơ̆ng bơngai tăh hla, mă loi hăm bơngai tăh hla tơ̆ tơring hơtăih yăih, tơring sơlam, achon kông, công nhân tơ̆ tơring jang kơmăy, druh dăm, sinh viên…. Dôm anih dăr hơlen athei hơlen năng rim tơdrong hơmet ăn Hop akŏm tơlĕch tơdrong pơgơ̆r pôk rơih lơ̆m 'năr 15/11; chih akŏm rim anih pôk rơih, hơnăn dôm anih pôk rơih păng kơsô̆ bơngai tang măt Quốc hội đei pôk rơih tơ̆ rim anih vă tơroi ăn Khul vei lăng pôk rơih teh đak chih hơdăh, roi tơbăt adrol kơ ‘năr 25/12/2025./.