VOV.Bahnar - 6Pơgê năr 5/8, Khŭl tơgoăt tơgoăl Việt Nam – Lào dêh char Dak Lăk (Việt Nam) hăm Khŭl tơgoăt tơgoăl Lào – Việt Nam dêh char Sê Kông (Lào) pơgơ̆r hop akŏm pơtôch 4 sơnăm pơm ‘nhŏng ŏh.

Dêh char Dak Lăk pôk tơmam drăm blŏk hơdơ̆r Tơgoăt tơgoăl Lào – Việt Nam dêh char Sê Kông

Lơ̆m 4 sơnăm au ki, 2 Khŭl dêh char Dak Lăk hăm Sê Kông hlôi tơlĕch lơ tơdrong jang ‘lơ̆ng hơ iă, tơgop hơmet pơ ‘lơ̆ng, kơ jăp hlŏh dơ̆ng tơgoăt tơgoăl dĭh băl ‘lơ̆ng hơ iă 2 păh tĕh đak Việt Nam - Lào. Ƀar păh vei kơ jăp bơ̆ jang hơdoi tơbăt dĭh băl kơtơ̆ng ang, pơjing rơvơn ăn kang ƀô̆ Khŭl dêh char kơ 2 dêh char năm ngôi dih băl, hŏk pơhrăm dĭh băl dôm tơdrong jang ‘lơ̆ng hơ iă. Khŭl jang Dak Lăk hlôi jang hơdoi, tơgum djru, dăr lăng kơ jăp bơ̆ jang pơtho pơhrăm, pơjing rơvơn ‘lơ̆ng hơ iă hloh ăn 59 ‘nu hŏk tro Lào tŏk bŏk hŏk pơhrăm tơ̆ rim hnam trương lơ̆m dêh char Dak Lăk. Vei kơ jăp pơgơ̆r Têt joăt joe Bunpimay rim sơnăm ăn kon pơlei Việt Nam hơdrĕch hơdrung Lào oei tơ̆ tơring Krông Na, apŭng Buôn Đôn.

Tơblơ̆ nơ̆r: Amazưt