Proh hơmet Khul kơdră chĕp pơgơ̆r Đảng dêh char Đắk Lắk jăl jang 2025-2030 đei 122 ‘nu, Khul kơdră chĕp pơgơ̆r Đảng dêh char đei 38 ‘nu. Khul kang ƀô̆ sơđơ̆ng ăn proh hơmet trŏ lăp ƀar păh rim jơhnơr. Lơ kang ƀô̆ hlôi đei hŏk pơhrăm, tơplih jang, proh tơmơ̆t, tơmơ̆t jang păng atŏk tơ iung đơ̆ng bơ̆ jang. Mă lei proh hơmet kang ƀô̆ ưh khan lăp rơih tôm bơngai. Tơdrong kăl hloh ‘noh rơih ƀlep bơngai păng pơjing rơvơn vă kang ƀô̆ atŏk tơ iung bơ̆ jang ‘lơ̆ng hơgei.

Yan ou đei ƀôh khul kang ƀô̆ sơnăm mơlôh, mă kăl ‘noh lơ̆m proh tơmơ̆t jang lơ̆m Khul kơdră chĕp pơgơ̆r Đảng dêh char, oei tŏ sĕt; măt bơngai kang ƀô̆ drŏ kăn lơ̆m mĭnh ƀar kơchư̆k tim mă lơ. Bơ̆ jang gơh dôm tơdrong jang hle tim mă hơtŏ dih băl. Oei đei kang ƀô̆ oei mơsuơ̆l mưh pơjao ăn dôm tơdrong jang tơnap tap nhen bơ̆ jang jên hu, groi teh, tơ iung pơjing. Lơ̆m bơ̆ jang chĕp pơgơ̆r khul kơdră tơring ƀar kâp, jơhngơ̆m đon ‘nhrơ̆, hli kơ glăi, hli chiu pŭ oei jing tơdrong kăl lăng hơlen hloh. Đơ̆ng đei ƀôh yan ou tơ̆ tơring, Bí thư Đảng ủy tơring Quảng Phú Vũ Hồng Nhật akhan, ‘long pơtŏ bơ̆ jang gơh kơ kang ƀô̆ mă tuch luch ‘noh bơ̆ jang keh đang tơdrong jang.“Mưh băt hơdăh hơnih tơhlăk tơhlĭn kăl akŏm khul jang, pơjao tơdrong jang mă hơdăh păng dăr lăng hơlen truh tôch vă pơjing đei tơdrong tơplih tơpă; tơdrong mă ƀar iŏk tơdrong jang keh đang lơ liơ ‘noh pơm ‘long pơtŏ ăn jang keh đang dang yơ. Kon pơlei lăng kang ƀô̆ jang tơnăp hơgei ưh khan ‘măng pơgơ̆r hop akŏm lơ ‘măng dăh mă hla bơar chih tơbăt mă lei dôm tơdrong hơdăh xek tơlang keh đang tơdrong păng dôm tơdrong tơplih đe sư ƀôh lơ̆m tơdrong hơrih.”

Trong tơchĕng ou kŭm tơlĕch lơ tơdrong hăm pơkăp kang ƀô̆ bơ̆ jang: Ưh hơdrô̆ hơlen lăng gah hô sơ, ƀăng hŏk pơhrăm dah mă tơdrong pơm jang, mă athei lăng lơ̆m tơdrong gơh pơm jang, păng pơm jang đei jơnei tơnăp. Pơma ah hop akŏm, Ƀĭ thư Tĭnh uy Đăk Lăk Lương Nguyễn Minh Triết ră hơdah, pơkăp athei tơpă 'noh pơtho pơhrăm kang ƀô̆ gơh hơgei; kiơ̆ đơ̆ng noh băt hrôih dôm bơngai đei đon bơnôh 'lơ̆ng, pơnam jang vă pơtho pơm jang, pơhrăm trŏ bơngai, trŏ tơdrong tơchơ̆t jang: “Athei hơtŏk tơ-iung 'nao kơ dêh char hơdrol hloh 'noh khŭl kang ƀô̆ athei tơplih 'nao đon tơchĕng, trong pơm jang lơ̆m khei năr dang ei. Bơ̆n ưh gơh pơm kiơ̆ tơdrong hlôi jang rok trong so sơ̆. Mă athei tơplih kơtang đơ̆ng đon tơchĕng vei lăng jing trong jang hơtŏk tơ-iung, đơ̆ng sek tơlang tơdrong jang hanh chĭnh jing tơdrong jang đei yua hơdah, đơ̆ng đon tơchĕng jang kơtă jing trong tơchĕng jang đunh khei năr păng gơh jang ăn lơ tơring”