VOV4.Bahnar - Đơ̆ng đei jĭ Covd-19 tơ pŏh, đe kăn ƀô̆, linh vei lăng tơ ring sơ lam dêh char Dak Lak hơ nơ̆ng adrin yak hloh dôm tơ drong mơ mat tat, gơ̆t lê̆ tơ drong chơt hơ iă kơ dih vă bơ̆ jang ‘lơ̆ng “ƀar tơ drong jang tơm”: Vei lăng ‘lơ̆ng tơ drong pơm tơm sơ đơ̆ng ‘lơ̆ng tơ̆ tơ ring sơ lam tĕh đak hai, jang ‘lơ̆ng tơ drong jang tang găn jĭ hai. Tơ drong ‘nâu roi pơm pơ ‘lơ̆ng hlŏh dơ̆ng um rup đe linh vei lăng tơ ring sơ lam tơ̆ Dak Lak.

Tŏk bŏk ‘năr tŏ hlơ hlĕng kơ khei 3 Tây Nguyên, tơ̆ anih gak plep Nhạp, xăh Ia Lốp, apŭng Ea Súp, dêh char Dak Lak, kăn ƀô̆, linh Kơ đông linh Ea H’leo oei jang tôch ‘lơ̆ng tơ drong dăr joang, vei lăng tơ ring sơ lam, tang găn jĭ Covid-19. Trung tá Nguyễn Thanh Tú, Phŏ Khul dăr joang, Kơ đông linh Ea H’Leo gak tơ̆ Anih gak plei Nhạp tơ roi: Đei khei ‘năr jĭ tơ pŏh tôch dêh, kon drŏ ngloi jĭ sinh viên oei hŏk tơ̆ plt Hồ Chí Minh tơ pŏh jĭ Covid-19 ưh đei unh hnam vei lăng. Hơ kăn tơ̆ hnam hơ nơ̆ng jĭ jăn dơ̆ng, mă lei ‘nhŏng kŭm hăm bôl boăl oei hơ nơ̆ng gak tơ̆ tởing sơ lam prăt măng, prăt năr, lơ khei hloi ưh đei vih tơ̆ hnam vă gơ̆h jang đang ‘lơ̆ng tơ drong jang đei pơ jao: “Kŭm pơ ngơ̆t dêh ră yoa kon hơ ‘lơ̆p thoi nŏh mă ba ưh đei bơ ngai lơ̆m hnam vei lăng tơ̆ noh. Tơ drong oei hơ drô̆ đơ̆ng mon thoi yơ, brŏk đơ̆ng hnam pơ gang lơ liơ, trong hơ met jĭ thoi yơ, pơm hla ar lĕch brŏk thoi yơ, ba ưh kơ băt, ba ưh đei jur kơ tă tơ̆ noh kơ na tôch pơ ngơ̆t. Mă lei athei chu đĕch bơih yoa tơ drong jang ba ‘nŏh athei blŭng a lĕ, đang kơ ‘nŏh athei pơ lung ăn kon kăn, pơm thoi yơ athei adrin yak hlŏh khei ‘năr mơ mat tat yoa tơ drong mơ mat tat ‘nâu jĭ tơ drong mơ mat tat atŭm đĭ đăng”.

Ƀô đô̆i vei lăng tơ ring sơ lam Dak Lak dăr joang, vei lăng tơ ring sơ lam

Hnam hơ tăih đơ̆ng Kơ đông hlŏh 40km, mă lei yoa tơ drong jang Trung úy Hà Văn Tân, kăn ƀô̆ Khul krao hơ vơn kon pơ lei Kơ đông linh Ea H’leo ƀât lăp truh hlŏh 1 puăt sơ năm ‘mơ̆i ‘nao vih ngôi tơ̆ hnam 1 vât. Trung uý Tân tơ roi: Dang ei hơ kăn oei jĭ F0, kon nge ‘nao 17 khei athei gơih ăn hnam tơ nei sư vei rong. Mă đơ̆ng tôch rơ nguơ̆ kơ kon kăn mă lei ‘nhŏng oei adrin oei tơ̆ kơ đông vă bơ̆ jang: “Mă tơ pă hơ kăn kŭm hlôh vao kơ na băt mơ nat hăm inh. Inh tôch rơ nguơ̆ kon kăn mă đơ̆ng ưh đei tơ tăih dang yơ ră mă lei đei khei ‘năr jĭ hơ buh hơ drol ki 3 khei ưh kơ đei brŏk tơ̆ hnam 1 ‘măng. Kơ dih kâu inh iŏk đơ̆ng mât tơ̆ hnam trưng hŏk pơ hrăm ‘nŏh hơ nơ̆ng tơ chĕng, năng tơ drong jang pơm linh jĭ tơm kơ na pơ lung kơ dih kâu adrin tôch ai vă jang đang ‘lơ̆ng rim tơ drong đei pơ jao”. 

Ƀô đô̆i vei lăng tơ ring sơ lam Dak Lak adrin vei kơ jăp tơ drong pơm tơm tơ̆ tơ ring sơ lam

Ƀât mă kŭm hăm bôl boăl bơ̆ jang tơ̆ tơ ring sơ lam, Trung uý Nông Văn Lợi, Kơ đông linh Ia R’vê iŏk đei nơ̆r tơ roi ƀă sư jĭ Covid-19 lôch tơ̆ Bình Dương lơ̆m khei ‘năr jĭ oei tơ pŏh dêh hlŏh. Trung uý Lợi tơ roi: Kơ tơ̆ng ƀă lôch hơ chăng inh tôch sơ ‘ngon. Mă lei kơ plăh dŏh jĭ oei tôch hơ mơt păng kơ dih kâu inh oei bơ̆ jang dơ̆ng kơ na ưh đei vih pơ dong ƀă: “Lơ̆m jơ năr bơ̆ jang gak tang găn jĭ Covid-19 iŏk đei nơ̆r tơ roi ƀă lôch hơ chăng tơ̆ Bình Dương. Jơ hngâm đon tôch tơ tăm ưh kơ hiôk kiơ, mă lei inh đei bôl boăl, ‘nhŏng ŏh, Đe yŏng kơ đông, Anih chĕp kơ̆l pơ gơ̆r krao điên thoăi pơ lung kơ na hơi ƀiơ̆. Kơ dih kâu jang lơ̆m khul linh đunh bơih kơ na jơ hngâm đon kŭm tôch kơ jăp, hơ nơ̆ng đei đon tơ chĕng, gơ̆h brŏk ‘nŏh vang tơ gŭm ăn unh hnam, oei ưh gơ̆h brŏk ‘nŏh krao điên thoăi apinh unh hnam mơ nat”.

2 sơ năm âu ki, bơ̆ jang 2 tơ drong jang tơm, dôm kơ đông linh vei lăng tơ ring sơ lam tơ̆ Dak Lak pơ jing hlŏh 5.000 khul grŭp hăm vă jê̆ 33.000 ‘nu kăn ƀô̆, linh vang akŏm dăr joang, vei lăng tơ̆ tơ ring sơ lam. Atŭm hăm ‘nŏh, vei kơ jăp 9 anih gak tang găn jĭ Covid-19. Kiơ̆ đơ̆ng dăr joang, ƀô đô̆i vei lăng tơ ring sơ lam Dak Lak chă ƀôh, rôp, sek tơ lang 18 tơ drong hăm 57 ‘nu bơ ngai pơm glăi tơ drong vei sơ đơ̆ng tơ̆ tơ ring sơ lam.

Trung uý Hà Văn Tân krao điên thoăi pơ ma nuh hăm kon kăn ƀât jơ pơ dơ̆h ngôi

Kiơ̆ Trung tá Nguyễn Văn An, Yŏng kơ đông linh Ia R’vê: Bơ̆ jang tơ drong jang đơ̆ng Anih chĕp kơ̆l pơ gơ̆r pơ jao, kơ đông vei lăng, tang găn lơ bơ ngai mât lĕch glăi luơ̆t, ưh ăn jĭ Covid-19 tơ pŏh: “Kăn ƀô̆, linh đơ̆ng kơ đông hơ nơ̆ng băt hơ dăh tơ drong jang vei lăng tơ drong pơm tơm, tơ drong sơ đơ̆ng tơ̆ tơ ring sơ lam hơ dai hăm bơ̆ jang tang găn jĭ Covid-19 păng băt hơ dăh tang găn jĭ nhen thoi tang găn hơ yăt. Yoa thoi nŏh, nhôn hơ nơ̆ng pơ lung băl, pơ tho băl hơ tŏk đon kơ chăng, jang mă tơ năp adrin hơ met pơ ‘lơ̆ng rim tơ drong mơ mat tat. Mă đơ̆ng tơ drong arih xa găh tơ mam drăm tơ̆ dôm kơ đông anih gak tôch mơ mat, tŏ hang, anih oei lăp pơm pơ gia đĕch dơ̆ng. Mă lei hăm rim kăn ƀô̆, linh hơ nơ̆ng hlôh vao, đei đon jang tôch tơ năp, jang đang ‘lơ̆ng rim tơ drong đei pơ jao”.

Dêh char Dak Lak đei 7 kơ đông linh vei lăng tơ ring sơ lam đei pơ jao vei lăng hlŏh 71km trong sơ lam tơ til hăm dêh char Mondukiri (Campuchia). Tơ ring sơ lam tơ̆ Dak Lak đei lơ trong iĕ, trong pơm kơ dih đei lơ tơ drong krê bơ ngai kơ dâu tơ̆ tĕh đak đe, dăh mă đơ̆ng tĕh đak đe mât glăi luơ̆t pơm tơ pŏh jĭ Covid-19 kiơ̆ đơ̆ng tơ ring sơ lam. Mă lei hăm đon pơ hnŏng tôch ai đơ̆ng kăn ƀô̆, linh vei lăng tơ ring sơ lam kŭm hăm tơ drong vang akŏm jơ hngâm bơ̆ jang đơ̆ng khul kơ dră pơ gơ̆r păng kon pơ lei, tơ drong pơm tơm tơ̆ tơ ring sơ lam Dak Lak hơ nơ̆ng đei vei lăng kơ jăp ‘lơ̆ng.

Tuấn Anh: Chih

Dơ̆ng: Tơ blơ̆