VOV4.Bahnar - 15 năr âu ki, tơ̆ apŭng Kon Plông, dêh char Kon Tum đei dôm jĭt ‘măng tĕh dơ drŏ. Mă loi ƀât kơ sơ̆ ‘năr 23/8 đei tĕh dơ drŏ jăng truh 4.7 đô̆ richter, jăng hlŏh lơ̆m dang 100 sơ năm âu ki. Tơ̆ hơ năp tơ drong krê ưh ê đơ̆ng tĕh dơ drŏ âu, tơ drong vei sơ đơ̆ng dơ nâu đak hnam kơ măy unh điên, dơ nâu mong đak vă tơ ruih ăn ‘long pơ tăm tơ̆ Kon Tum tŏk bŏk đei khul kơ dră pơ gơ̆r tơ ring kŭm nhen anih vei lăng tôch năng kăl.

Kơ măy pơ tŏ hơ len păng dăr lăng đak pơm kơ pal bơ nơ̆ dơ nâu đak Hnam kơ măy unh điên Thượng Kon Tum

Ƀok Lê Đức Tín, Phŏ Kơ dră vei lăng kon pơ lei apŭng Kon Plông ăn tơ băt, khul kơ dră chĕp kơ̆l apŭng hlôi hơ tŏk tơ drong vei lăng, mă loi hăm 2 dơ nâu mong đak kơ Hnam kơ măy unh điên tih, đei: Đăk Đrinh mong hlŏh 248 triu m3 đak păng dơ nâu mong đak Hnam kơ măy unh điên Thượng Kon Tum mong hlŏh 145 triu m3 đak. Kŭm hăm 3 anih pơ tŏ hơ len tĕh dơ drŏ hlôi đei pơ lăp, Công ty Hnam kơ măy unh điên Thượng Kon Tum jang hơ doi hăm Anih jang Vật lý plei tĕh hơ nơ̆ng pơ lăp dơ̆ng 3 tơ̆ Hnam kơ măy roi tơ băt hrôih păng pơ yoa ăn tơ drong tơ chĕng hơ len găh tĕh dơ drŏ lơ̆m tơ ring.

Dơ̆ng: Tơ blơ̆