VOV4.Bahnar - Kơ dră jang lơ̆m Anih tơm Chinh trĭ, Phó Thủ tướng Phạm Bình Minh kĭ hla ar kơ sô̆ 724 đơ̆ng Thủ tướng tĕh đak găh tơ drong vei lăng sơ đơ̆ng tơ pôl, sơ đơ̆ng tơ̆ trong nơ năm ƀât pơ dơ̆h lêh Quốc khánh 2/9. Lơ̆m nŏh, Thủ tướng athei, đei trong vei lăng sơ đơ̆ng ‘lơ̆ng ăn tơ drong chơ chuĕn bơ ngai păng tơ mam, mă loi jĭ tơ drong chơ chuĕn bơ ngai hăm trong gre tĕh, trong đak păng trong gre păr ƀât lêh Quốc khánh 2/9 păng tơ drong yak vih vât đơ̆ng hŏk tro, sinh viên; athei dôm anih jang găh gre chơ chuĕn, dôm anih chơ chuĕn tih, bơ̆ jang mă ‘lơ̆ng dôm tơ drong hơ găt đơ̆ng luơ̆t găh tơ drong vei sơ đơ̆ng tơ̆ trong nơ năm; ưh gơ̆h lê̆ đei tơ drong kơ dâu tơ gar băl trong, pơm tơ hlăk, hrăt hrot tơ̆ dôm anih gre dơ̆ng, tơ nŏk duk, tơ drong chơ ƀĕnh bơ ngai, chơ hlŏh kơ sô̆ tang dŏ, sơng, tơ jur tơ moi ưh trŏ hơ nih. Kơ chăng pơ jing trong pơ gơ̆r vei lăng sơ đơ̆ng gre kơ dâu vih vât, hiôk hian, mă loi tơ̆ dôm jăl trong, tơ ring ƀônh đei gre tâm prĕh băl, chĭl trong, dôm trong gre mât lĕch tơ̆ Hà Nội păng plt Hồ Chí Minh.

Kanh sat vei lăng trong nơ năm hơ tŏk tơ drong dăr joang ƀât ‘năr 2-9

Vă vei sơ đơ̆ng trong nơ năm năr lêh 2/9, Anih vei lăng kon pơ lei dêh char Dak Lak hlôi athei rim khŭl jang nhen: dăr hơ len trong nơ năm, kanh sat vei lăng trong nơ năm, kanh sat vei lăng tơ drong sơ đơ̆ng... hơ tŏk loi dơ̆ng tơ drong jang dăr joang, vei lăng, sek phak tơ păt dôm bơ ngai pơm glăi trong nơ năm; tŭn pran tơ roi tơ băt truh rim răih kon pơ lei, mă loi ‘noh jĭ lơ̆m dôm hnam trưng hŏk vă kon pơ lei pơm kiơ̆ tơ păt Luơ̆t trong nơ năm. Hơ dai hăm ‘noh, tơ lĕch jang pơ̆ih dôm trong tơ ley điên thoăi kăl tơ̆ Hơ nih jang kanh sat vei lăng trong nơ năm Kŏng an dêh char kơ sô̆ điên thoăi: 0262.3692888; Anih vei lăng trong nơ năm gre kơ dâu Dak Lak dôm kơ sô̆: 0916.107447; 0983.436091 păng Anih vei lăng sơ đơ̆ng trong nơ năm dêh char Dak Lak kơ sô̆: 0914.032356, vă sơng iŏk, hơ met ‘lơ̆ng tơ drong tơ roi găh tơ drong ưh kơ sơ đơ̆ng trong nơ năm, sơ đơ̆ng tơ pôl. Ƀok Bùi Văn Ngọc – Chánh Văn Phòng Anih vei lăng sơ đơ̆ng trong nơ năm dêh char Dak Lak tơ băt: đơ̆ng blŭng sơ năm truh dang ei, tơ drong sơ đơ̆ng trong nơ năm tơ̆ Dak Lak tơ jur dang ăi tơ̆ pơ đĭ 3 tơ drong hơ găt, ‘noh jĭ kơ sô̆ ‘măng gre tơ̆m preh băl kơ tang, kơ sô̆ bơ ngai lôch păng rơ ka. Mă hơ dăh, lơ̆m hloh 8 khei âu ki lơ̆m dêh char Dak Lak đei ƀôh 151 ‘măng gre tơ̆m preh băl kơ tang, pơm ăn lôch 112 ‘nu, rơ ka 76 ‘nu. Pơ têng hăm khei ‘nâu sơ năm sơ̆ tơ jur 9 ‘măng, 11 ‘nu lôch păng 35 ‘nu rơ ka.

Nơ̆r tơ roi đơ̆ng Công ty jang hơ doi Anih gre dơ̆ng Hà Nội ăn tơ băt, vă pơ vih ăn tơ drong yak vih vât đơ̆ng kon pơ lei ƀât năr pơ dơ̆h lêh 2/9, Công ty vă hơ tŏk 580 tŏ gre tơ̆ dôm anih gre dơ̆ng. Pơ jao ăn dôm anih gre dơ̆ng tơ lĕch trong pơ vih, hơ met tôm tơ mam nhen vĕ, anih tĕch vĕ, tĕch vĕ ăn dôm jăl trong kơ dâu lơ păng pơ tho ăn dôm anih vei lăng, pơ gơ̆r jang mă ‘lơ̆ng tơ drong vei sơ đơ̆ng tơ̆ trong nơ năm, tang găn unh xa đôh, vei rơ gŏh cham char tơ̆ dôm anih gre dơ̆ng. Atŭm hăm ‘nŏh, jang hơ doi hăm Anih pơ gơ̆r vei lăng gre buyt đơ̆ng công ty tơm chơ chuĕn Hà Nội hơ tŏk kơ sư̆k kơ dâu păng gre vih vât vă pơ vih tơ tom ăn tơ moi năm truh, mât lĕch lơ̆m pơ lei tơm (plt). Kiơ̆ Công ty jang hơ doi găh Anih gre dơ̆ng Hà Nội, kơ sô̆ bơ ngai yak vih vât lơ̆m nărr pơ dơ̆h lêh 2/9 tŏk lơ, lơ̆m nŏh đei lơ jơ năr tŏk tôch lơ, mă loi ƀât kơ sơ̆ 31/8 păng ‘năr 1/9; trong tơ moi yak vih vât lơ dêh hlŏh lơ̆m ‘năr 4/9/2022.

Dơ̆ng hăm Thuem: Tơ blơ̆