Tơ̆ dơnŏk duk ƀô̆ đô̆i Cam Ranh, dôm bơngai vơ̆r duk môch đak 189 Khul Ƀô̆ đô̆i đak dơsĭ hơngŭr pơhrăm kơchăng iung tơblăh. Hăm kang ƀô̆, ƀô̆ đô̆i vơ̆r duk, iŏk jang vơ̆r duk môch đak Kilo 636 gơh hơgei ưh khan lăp tơdrong hưch hanh mă oei jing hơnăp jang gĭt kăl hloh dơ̆ng. Hăm ư̆ hơnăn “Sơlŭng găm goi đak dơsĭ”, duk môch đak Kilo 636 đei kmăi kmŏk ƀrơ̆m phao kơtang gơh hơgei , pơkoel kang ƀô̆, ƀô̆ đô̆i vơ̆r duk kăl băt hơdăh păng iung jang jơnei vă iung jang hơdoi klĕp klĕp kơjăp ‘lơ̆ng hăm rim khul, vei lăng năng tông kơjăp iăp kơtang pơm tơ-‘ngla đak dơsĭ, achon dơsĭ Teh đak. Thượng tá Hàn Văn Hiếu, Bơngai tơm vơ̆r Duk môch đak 182-Hà Nội, tơbăt:"Nhôn ling lang lăng tơdrong pơhrăm ‘noh jĭ tơdrong jang tơm, iŏk jang hloi jĭ tơdrong tơm hloh, chă pơhrăm kiơ̆ ƀlep hăm tơdrong iung tơblăh vă pơm hơtŏk iung jang kơchăng kơtang iung tơblăh, pơm tơ-‘ngla duk môch đak, iung jang kơtang păng jang ‘lơ̆ng dôm tơdrong jang đei pơjao, vei lăng kơjăp pơm tơm tơ-‘ngla đak dơsĭ, achon dơsĭ kơ Teh đak."

Jĭ mĭnh hơnih bơ̆ jang gĭt kăl, jăl trong kơ rim ‘măng năm pơtrui tơ̆ đak dơsĭ jĭ mĭnh tơdrong long nol. Rim kang ƀô̆, bơngai vơ̆r duk môch đak lơ năr hơnơ̆ng ưh kơ ƀôh măt ‘năr. Hơnih oei iĕ, ưh kơ măh hơyuh. Lăp pơm glăi iĕ ioch jei gô pơm ăn truh tơdrong ưh sơđơ̆ng kơ duk. Kiơ̆ đơ̆ng Thượng tá Nguyễn Văn Thuân, Chính trị viên Duk môch đak 183 - Pơlei tơm HCM tơbăt: ‘Ngoăih tơdrong hlôh vao bơ̆ jang, bơngai ƀô̆ đô̆i duk môch đak kăl đei jơhngơ̆m đon nuih mơng pran kơtang vă iung jang tơdrong bơ̆ jang lơ̆m klŏng đak dơsĭ. “Tơdrong jang kơ nhôn ‘noh jĭ tơdrong bơ̆ jang tôch gĭt kăl, lơ̆m duk rim bơngai jĭ mĭnh, đĭ đăng kang ƀô̆, ƀô̆ đô̆i jei tơgoăt jing mĭnh khul kơjăp iăp kơtang. Lăp đei mĭnh hơnih dăh mă mĭnh ‘nu bơngai đei jơhngơ̆m đon hul hơl gô pơm kơnê̆ trŭh lơ̆m khul păng đei ƀơm kơtă truh tơdrong jang keh đang tơdrong jang kơ hơnih. Kơ yuơ lơ loh, rim ‘măng năm pơtrui, pơđĭ khul ƀô̆ đô̆i lơ̆m duk jei kăl đei mĭnh jơhngơ̆m đon, tơ iung pơjing jơhngơ̆m đon chinh trĭ kơjăp iăp kơtang, vei kơjăp jơhngơ̆m đon tơgoăt tơgoăl dih băl kơjăp, lăp mĭnh ƀơ̆r đon păng kơrŭn đĭ ai vă iung jang keh đang ‘lơ̆ng hloh tơdrong jang đei pơjao”.

Hui bơngai băt akhan, vă đei ‘măng iung năm pơtrui sơđơ̆ng ‘lơ̆ng hơ iă năr ou, rim jơhnơr kang ƀô̆, ƀô̆ đô̆i vơ̆r duk kơ Lữ đoàn 189 Khul ƀô̆ đô̆i đak dơsĭ hlôi yak hloh ưh kơbăt dôm yơ tơdrong mơmat tat hrat hrĭn. Đơ̆ng tơdrong hŏk nơ̆r teh đak đe, pơm joăt hăm nơ̆r pơkăp kih thuơ̆t mơmat tat truh hŏk pơhrăm iŏk yoa kmăi kmŏk gơh hơgei hloh lơ̆m apŭng plĕnh teh … đĭ đăng jei jing dôm tơdrong long tih tên. Trung tá Nguyễn Đình Danh, Duk môch đak 186 - Đà Nẵng, tơbăt:“Lăp đei iŏk lăng dôm tai liu bơ̆ jang, nhôn hlôi kơrŭn đĭ ai chă lăng hơlen hok pơhrăm, pơma dơnuh dih băl kiơ̆ khul, kiơ̆ grŭp, đơ̆ng rŏng ‘noh jang kiơ̆ dôm tơdrong hlôi đei hŏk pơhrăm lơ̆m teh đak atŭm hăm dôm tơdrong đei hŏk pơhrăm tơ̆ teh đak đe vă băt hơdăh hlôh vao iok yoa kmăi kmŏk. Mưh đei hok pơhrăm kơtă păng jang hloi hăm dôm kmăi kmŏk kih thuơ̆t, nhôn hlôi iung jang hloi, băt hơdăh trong iŏk yoa păng vei lăng hơmet ming rim kmăi kmŏk ‘noh. Gơnơm đơ̆ng noh, kang ƀô̆, ƀô̆ đô̆i vơ̆r duk tĕnh koăng băt hơdăh iŏk yoa phao kơtoang, kmăi kmŏk gơh hơgei”.   

Đơ̆ng rim lăm hŏk blŭng a oei sơl vơ̆l kơ dôm bơngai vơ̆r duk môch đak tơ̆ Liên Bang Nga, đơ̆ng dôm năr hơngŭr tơ̆ hơnih pơhrăm tơblăh, lơ̆m kmăi kmŏk truh tơ̆ Hơnih tơm Pơtho pơhrăm duk môch đak tơ̆ Cam Ranh păng lơ̆m đak dơsĭ jrŭ, truh dang ei, kang ƀô̆, ƀô̆ đô̆i vơ̆r duk Lữ đoàn 189 hlôi pơm tơ-‘ngla rim duk môch đak gơh hơgei Kilo 636. Thượng tá Phan Thanh Quang, Kơ iĕng Kơdră chĕp pơgơ̆r Lữ đoàn, Kơdră pơchoh trong, Lữ đoàn Duk môch đak 189 Ƀô̆ đô̆i đak dơsĭ tơbăt: “Dôm sơnăm ou ki, Lữ đoàn hlôi hơnơ̆ng atok kơtang pơtho pơhrăm chinh trĭ, jơhngơ̆m đon, pơm trong atok kơtang jơhngơ̆m đon hơdrin păng bơ̆ jang tơnăp lơ̆m iung jang tơdrong jang, akom pơtho tơbăt dôm tơdrong joăt joe, jơhngơ̆m đon hưch hanh hơmanh bơnê đei pơvih pơvăn, plang ăn lơ̆m khul; pơm hơtok jơhngơ̆m hưch hanh, tơnăp, hơnăp jang kơtang kơ kang ƀô̆, ƀô̆ đô̆i vơ̆r duk lơ̆m tơdrong hŏk pơhrăm păng bơ̆ jang. Kiơ̆ yok rok jơ̆ng joăt joe “Tơgoăt pôm nơ̆r ƀơ̆r đon, tơnăp, jang hrĕp, khŏm jơnei” kơ Hơnih Ƀô̆ đô̆i nuih mơng pran kơtang, kang ƀô̆, ƀô̆ đô̆i Lữ đoàn Duk môch đak 189 gô hơnơ̆ng tơgoăt pôm nơ̆r ƀơ̆r đon, iung jang kơtang hơmet pơ ‘lơ̆ng tơnap tap, kơrŭn đĭ ai jang keh đang ‘lơ̆ng tơdrong pơjao, tơgop vei lăng năng tông kơjăp iăp kơtang pơm tơ-‘ngla đak dơsĭ, achon dơsĭ gĭt kăl kơ Teh đak”.

Lơ̆m chăl hrei ou, tơdrong jang vei lăng pơm tơm teh đak đơ̆ng lơ̆m đak dơsĭ kơ Lữ đoàn duk môch đak 189 Ƀô̆ đô̆i đak dơsĭ roi năr roi trăp trĭn. 15 sơnăm-mĭnh jăl trong tim mă hơtăih plăih kơjung mă lei jei tôm vă sơkơ̆t hơdăh hơnih dơ̆ng kơ mĭnh khul gĭt kăl nuih mơng pran kơtang gơh hơgei kơ Khul Ƀô̆ đô̆i đak dơsĭ kon pơlei Việt Nam. Lơ̆m klŏng đak dơsĭ, dôm ƀô̆ đô̆i duk môch đak oei hơngŭr plang ăn jơhngơ̆m đon vei lăng năng tông kơjăp iăp kơtang ăn đak dơsĭ kơ Teh đak. Dôm ƀô̆ đô̆i gĭt kăl lơ̆m hơnih jang gĭt kăl - tŏk bŏk chih dơ̆ng “Nơ̆r hơri nuih mơng pran kơtang tŏk bŏk đak dơsĭ” đơ̆ng lơ̆m klŏng đak dơsĭ, vei lăng năng tông kơjăp iăp kơtang pơm tơ-‘ngla đak dơsĭ, achon dơsĭ, bro tơm đak dơsĭ gĭt kăl kơ Teh đak.