VOV4.Bahnar - Hloh 1 puăt khei âu ki tơ̆ apŭng Kon Plông, dêh char Kon Tum hlôi đei dôm ‘măng teh tơ drŏ. Mă loi ‘noh kơ sơ̆ ‘năr 23/8 đei teh tơ drŏ jăng 4.7, tih hloh lơ̆m dang 100 sơ năm âu. Tơ̆ hơ năp đei ƀôh ư kơ ê đơ̆ng teh tơ drŏ âu, tơ drong vei sơ đơ̆ng dơ nâu mong đak hnam kơ măy ŭnh điên, dơ nâu bơ̆ găn đak vă tơ jră hăm teh tơ drŏ tơ̆ Kon Tum tŏk bŏk đei khŭl kơ dră kŭm nhen anih jang vei lăng tôch kơ tơ rĕk truh.

Apŭng Kon Plông, dêh char Kon Tum, hơ nih 1 puăt khei âu ki hlôi đei dôm jĭt ‘măng teh tơ drŏ, dang ei đei 6 hnam kơ măy ŭnh điên păng 125 dơ nâu mong đak. Ƀok Lê Đức Tín, Phŏ Kơ dră Anih vei lăng kon pơ lei apŭng Kon Plông, tơ băt tơ̆ hơ năp tơ drong teh tơ drŏ đei ƀôh hơ nơ̆ng, ưh kơ ê, khŭl kơ dră apŭng hlôi hơ tŏk loi dơ̆ng tơ drong jang vei lăng, dăr lăng, mă loi ‘noh jĭ hăm 2 dơ nâu mong đak hnam kơ măy ŭnh điên tih, ‘noh: Đăk Đrinh hăm mong hloh 248 triệu m3 đak păng dơ nâu mong hnam kơ kơ măy ŭnh điên Thượng Kon Tum hăm mong hloh 145 triệu m3 đak:  

“Apŭng hơ nơ̆ng răp hơ len lăng, dăr lăng tơ drong jang kiơ̆ mong đak lơ̆m dơ nâu đak đơ̆ng dôm tơ ‘ngla jang ŭnh điên. Kiơ̆ đơ̆ng răp hơ len lăng, dăr lăng đe sư pơm kiơ̆ nơ̆r athei đơ̆ng Trung ương hăm đơ̆ng dêh char, ưh kơ mong tôch ai kiơ̆ kơ sư̆k đơ̆ng dơ nâu mong. 2 dơ̆ng athei đe sư tŭn hrĕnh tơ drong pơ lăp dôm Hơ nih vei lăng cham char, tŏ ‘mi kial. Hơ tŏk loi dơ̆ng Hơ nih vei lăng cham char, tŏ ‘mi kial ‘noh tơ roi tơ băt mă ƀlep hloh. Mưh đei ƀôh tơ drong ‘noh kiơ̆ tơ drong tơ chơ̆t vei lăng đei tơ drong jang hơ dai kơ jăp đơ̆ng tơ ‘ngla tơ drong jang hăm khŭl kơ dră tơ ring păng Khŭl pơ gơ̆r tang găn ‘Mi kial đak tih kơ apŭng.”

Hơ len lăng tơ drong vei sơ đơ̆ng dơ nâu mong đak hnam kơ măy ŭnh điên  Kon Tum đơ̆ng rŏng dôm ‘măng teh tơ drŏ

Đei lăng jĭ 1 lơ̆m dôm tơ drong kĕ pơm ăn dôm ‘măng teh tơ drŏ tơ̆ apŭng Kon Plông, dêh char Kon Tum, tơ drong jang vei lăng dơ nâu mong đak hnam kơ măy ŭnh điên Thượng Kon Tum dang ei tŏk bŏk đei bơ̆ jang kơ jăp. Kŭm hăm 3 Hơ nih vei lăng cham char, tŏ ‘mi kial pơ tŏ teh tơ drŏ hlôi pơ lăp, Kŏng ti jang găh dơ nâu đak hnam kơ măy ŭnh điên Thượng Kon Tum pơm hla ar jang hăm Anih jang Vật lý địa cầu hơ nơ̆ng pơ lăp 3 Hơ nih dơ̆ng vă roi tơ băt lê̆ hơ drol tơ tom păng pơ yua ăn tơ chĕng hơ len jrŭ găh teh tơ drŏ lơ̆m tơ ring. Anih jang âu kŭm thuê bơ ngai joăt pơ tho tơ ƀôh tơ chĕng jô̆ hơ len dơ̆ng tơ drong teh tơ drŏ lăp hăm dôm kơ sô̆ đak pha ra băl păng kiơ̆ jô̆ hơ len dơ nâu mong đak pŭ đei teh tơ drŏ jăl 7. Ƀok Trần Công Đàm, Kơ dră vei lăng Kŏng ti hnam kơ măy ŭnh điên Thượng Kon Tum, găh kŏng ti tơ mơ̆t jên jang hơ dai Hnam kơ măy ŭnh điên Vĩnh Sơn- Sông Hinh pơ ma hơ dăh, anih jang pơm kiơ̆ tơ păt trong jang vei lăng 2 dơ nâu mong đak păng kŭm hlôi tơ lĕch trong jang tơ jră hăm teh tơ drŏ:

“ Kŏng ti vei lăng dơ nâu mong đak lơ̆m noh đei tơ drong đak lơ̆m dơ nâu pơ yan đak ‘mi tih kŭm nhen pơ yan đak hrơ̆ pơm kiơ̆ tơ păt trong jang vei lăng 2 dơ nâu mong đak lơ̆m đak krong Sê San păng trong vei lăng dơ nâu đak Thượng Kon Tum yua đơ̆ng Anih tơm vei lăng găh kơ măy kơ mŏk, mơ dro sa kĭ ăn. Jang kiơ̆ dôm trong jang vei lăng cham char, tŏ ‘mi kial kiơ̆ ƀlep tơ drong tơ chơ̆t 114 păng dôm tơ drong hơ găt kŭm nhen athei nai đơ̆ng Trung ương hăm tơ ring. Kŏng ti hlôi tơ lĕch trong jang tơ jră teh tơ drŏ vă kơ mưh đei teh tơ drŏ kang ƀô̆ bơ ngai jang Kŏng ti gô kơ chăng păng tơ tom bơ̆ jang kiơ̆ dôm trong jang tơ jră mă ưh kơ gô athei đơ̆ng kơ pal pơm truh hiơ̆ hyĭn”.

Khoa Điềm: Chih

Thuem: Tơ blơ̆