VOV4.Bahnar - Giĕng âu ki, tơ̆ ‘măng hop akŏm Anih pơ gơ̆r vei lăng kơ jă tĕch mơ dro tơ mam kơ Khŭl kơ dră teh đak, Phŏ Thủ tướng Lê Minh Khái hlôi pơ ma hơ dăh: Rim Anih tơm, anih jang tơ ring kăl kơ lăng kiơ̆ lơ̆m tơ drong yan âu, tơ lĕch dôm trong jang vei kơ jăp sơ đơ̆ng kơ jă lơ̆m tơ drong hiôk vă tơ gŭm tơ iung ming dơ̆ng mŭk drăm, vei sơ đơ̆ng tơ drong arih sa kon pơ lei, pơ yua ăn tơ drong jang tang găn jĭ COVID-19; lơ̆m noh pơ ma hơ dăh vei măh mai đak xăng đak dâu pơ yua ăn ‘meh vă pơm tơ lĕch, tĕch mơ dro păng tơ drong arih sa kon pơ lei.

Kiơ̆ kơ bơ ngai chih kơ tơ̆ng ang kơ Anih Radio nơ̆r pơ ma VN oei tơ̆ Tây Bắc, đơ̆ng rŏng ‘măng pơ dơh Têt Nguyên đán, đak xăng đak dâu hơ nơ̆ng tŏk kơ jă tŏk bŏk pơm ăn lơ mơ mat tat ăn kon pơ lei păng anih jang mơ dro sa lơ̆m tơ ring. Đak xăng tŏk kơ jă tôch kơ măk, pơm ăn lơ  kon pơ lei tơ tăm găh jên mưh răt yua. ‘Nhŏng Nguyễn Trọng Thủy oei phường Yên Ninh, pơ lei tơm Yên Bái tơ băt: 

“Lơ̆m khei ‘năr mơ mat tat âu mă đak xăng tŏk kơ tôch kơ măk thoi noh ‘noh tơ drong arih sa kŭm mơ nat thim. Hơ drô̆ jên tuh đak xăng năm vih vơ̆t đơ̆ng kơ dih ĭnh kŭm athei hiong thim dôm hrĕng rơ bâu 1 khei, tam mă jô̆ tơ mam drăm gô tŏk kiơ̆”.

Lơ hnam gre tơ̆ Yên Bái kŭm tơ băt, tam mă ƀyơh huŏng lơ̆m tơ drong mơ mat tat nhen hrei ‘nâu. Ƀơm ưh kơ ‘lơ̆ng đơ̆ng jĭ hơ buh COVID-19 pơm ăn khei ‘năr đunh âu ki, tơ moi năm vih vơ̆t jur, dôm hnam gre athei ‘mong lôh. Đơ̆ng rŏng Têt, lơ̆m tơ drong arih sa sơ đơ̆ng hmă, rim anih jang mơ dro sa gre kơ dâu gơh iŏk ‘yăi dôm yơ păi, mă lei ‘noh tơ jră hăm kơ jă đak xăng, đak dâu tŏk tôch kơ măk.

Vei lăng anih tĕch mơ dro Kon Tum hơ len lăng 1 hơ nih tĕch mơ dro đak xăng đak dâu

Bơ ngai chih kơ tơ̆ng ang kơ Anih radio nơ̆r pơ ma Việt Nam oei tơ̆ tơ ring Tây Nguyên kŭm tơ roi, tơ̆ hơ năp tơ drong đak xăng, đak dâu tŏk kơ jă ƀơ̆t mă ‘meh vă yua đak dâu vă ƀôm đak tơ ruih ăn ‘long pơ tăm đơ̆ng kon pơ lei tŏk lơ yua đơ̆ng tŏk bŏk jing pơ yan tŏ tơm, khul jang kơ pal tŏk bŏk hơ tŏk loi dơ̆ng tơ drong jang năm hơ len lăng, dăr lăng anih tĕch mơ dro đak xăng, đak dâu. Ƀok Ngụy Đình Phúc, Kơ dră Khŭl vei lăng anih tĕch mơ dro kơ sô̆ 2, Anih vei lăng găh tĕch mơ dro dêh char Kon Tum tơ băt:

“’Moi kiơ̆ đơ̆ng hơ len lăng Khŭl vei lăng anih tĕch mơ dro nhôn kŭm tơ roi tơ băt ăn rim hơ nih tĕch đak xăng đak dâu băt đei dôm trong jang tơ lĕch ăn lơ̆m tơ drong jang tĕch mơ dro. Pơm kiơ̆ tơ drong hơ găt găh jơ pơ̆ih ‘măng, tĕch tơ mam măh tôm. Tơ dăh nhen pơ dơh kơ tĕch mơ dro athei đei roi tơ băt hăm hla ar ăn anih jang kơ pal. Kiơ̆ đơ̆ng hơ len lăng khei ‘năr tơ jê̆ âu Khŭl vei lăng anih tĕch mơ dro nhôn tam mă chă ƀôh bơ ngai yơ pơm glăi găh tĕch mơ dro đak xăng đak dâu. Đak xăng, đak dâu lơ̆m tơ ring tơ̆ 3 apŭng măh mai pơ yua ăn kon pơ lei.”

Hơ nih tĕch đak xăng đak dâu Kon Tum, găh Kŏng ti Đak xăng đak dâu Bắc Tây Nguyên đei lơ tơ mam tĕch đei hăm dang 60%. Ƀok Võ Duy Tuấn, Kơ dră vei lăng Hơ nih tĕch đak xăng dâu Kon Tum tơ roi, jô̆ păh lăp rim khei anih tĕch đei dang 6.500 m3 đak xăng, đak dâu. Hơ drô̆ lơ̆m khei 1 âu ki đak xăng đak dâu tĕch đei tŏk truh 8.000 m3. Tơ drong ‘nâu ăn ƀôh ‘meh vă yua đak xăng đak dâu lơ̆m pơ yan tŏ tŏk bŏk tôch kơ lơ.

“Anih jang hơ nơ̆ng mong răk hiă dang 80% kơ sư̆k mong, hơ tŏ hăm 1.860 m3. Nhôn đei athei rim hơ nih tĕch đak xăng đak dâu athei hơ tŏk loi dơ̆ng hơ met ăn bơ ngai jang vă ling lang pơ yua ăn kon pơ lei păng anih jang mơ dro sa. Athei pơm kiơ̆ ƀlep jơ năr pơ̆ih ‘măng tĕch ƀlep hăm jơ năr mă hlôi pơm hla ar hăm Anih vei lăng găh kơ măy kơ mŏk mơ dro sa. Kiơ̆ hơ len lăng oei đei lơ̆m hơ nih mong răk hơ nơ̆ng păng pơm hla ar răt tơ mam tơ tom.”

Giĕng âu ki, tơ̆ ‘măng hop akŏm Anih pơ gơ̆r jang vei lăng găh kơ jă tĕch tơ mam đơ̆ng Khŭl kơ dră teh đak, Phŏ Thủ tướng Lê Minh Khái hlôi pơ ma hơ dăh: Rim anih tơm, anih jang tơ ring kăl kơ lăng kiơ̆ lơ̆m tơ drong yan âu, tơ lĕch jang dôm trong jang vei kơ jăp sơ đơ̆ng kơ jă lơ̆m tơ drong kĕ jang vă tơ gŭm tơ iung ming mŭk drăm, vei sơ đơ̆ng tơ drong arih sa kon pơ lei, pơ yua ăn tơ drong jang tang găn jĭ COVID-19; lơ̆m noh pơ ma hơ dăh vei sơ đơ̆ng măh mai đak xăng đak dâu pơ yua ăn ‘meh vă pơm tơ lĕch, tĕch mơ dro păng tơ drong arih sa kon pơ lei.

Hop akŏm Anih pơ gơ̆r vei lăng kơ jă tĕch mơ dro đơ̆ng Khŭl kơ dră teh đak

Tơ blang hơ dăh dơ̆ng găh tơ mam đak xăng đak dâu, Phŏ Thủ tướng akhan, ‘nâu jĭ tơ mam yua kăl, pŭ ƀơm ưh kơ ‘lơ̆ng tôch kơ tih đơ̆ng kơ jă tĕch mơ dro lơ̆m anih tĕch mơ dro apŭng plĕnh teh. Đơ̆ng ‘năr 11/1 truh ‘năr  21/2, kơ jă dôm tơ mam đak xăng đak dâu hlôi tŏk đơ̆ng 15,45-20,88%, mă lei kơ jă dôm tơ mam đak xăng đak dâu lơ̆m teh đak lăp tŏk đơ̆ng 9,59-14,04%. Tơ drong ‘nâu tơ ƀôh hơ dăh bơ̆n hlôi vei lăng tơ tĕnh, kơ jă tŏk kŭm ưh kơ măh lơ dêh mơ̆n, tŏ sĕt ƀiơ̆ kơ dôm teh đak lơ̆m tơ ring.

Mă lei, tơ drong kơ jă đak xăng đak dâu lơ̆m teh đak tŏ sĕt hloh kơ jă đak xăng đak dâu 1,2 teh đak tơ jê̆ gô hơ nhăk truh tơ drong tĕch mơ dro ôn tơ mam ‘nâu. Yua thoi noh, rim anih jang kơ pal ƀơm truh kŭm kăl kơ hơ tŏk loi dơ̆ng hơ len lăng, vei lăng tang găn tơ drong tĕch ôn đak xăng đak dâu klĕch tơ ring sơ lam. Phŏ Thủ tướng Lê Minh Khái athei, Anih tơm vei lăng găh kơ măy kơ mŏk mơ dro sa hơ nơ̆ng tơ lĕch jang trong jang vei sơ đơ̆ng măh mai đak xăng đak dâu pơ yua ăn ‘meh vă pơm tơ lĕch tĕch mơ dro păng tơ drong arih sa kon pơ lei.... Rim anih jang kơ pal hơ tŏk loi dơ̆ng hơ len lăng, vei lăng, sek phak hloi dôm tơ drong pơm glăi kiơ̆ tơ drong hơ găt đơ̆ng khôi luơ̆t.

“Ĭnh athei kiơ̆ tơ drong hơ găt đơ̆ng khôi luơ̆t kơ jă ‘noh bơ̆n athei yua đĭ đăng dôm trong jang đơ̆ng teh đak vei lăng, dăr lăng vă bơ̆ jang đei iŏk yua. Pơ tih gia tơ mam hơ yơ kăl kơ sơ đơ̆ng kơ jă ‘noh bơ̆n athei iŏk yua dôm tơ mam sơ đơ̆ng kơ jă nhen iĕm băt hơ met pơ ‘lơ̆ng kơ jă kiơ̆ luơ̆t ‘nâu đei 4 tơ drong 1 ‘noh sơ đơ̆ng kơ jă, 2 ‘noh hơ len lăng, 3 ‘noh pơ ma dơ nuh kơ jă păng 4 ‘noh hơ len lăng dôm tơ drong tơm pơ jing kơ jă. Đang kơ ‘noh tơ băt kơ dăh kơ tơ̆ng ang găh kơ jă mă lei athei tơ păt kiơ̆ lơ̆m tơ drong jang hơ dai đơ̆ng rim anih tơm anih jang hăm băl”.

Thuem: Tơ blơ̆