VOV4.Bahnar - Anih tơm vei lăng găh choh jang sa păng hơ tŏk tơ iung tơ ring tơ rang ‘nao đei Tơ chơ̆t găh tơ drong pơ gơ̆r Têt Nguyên đán Nhâm Dần 2022. Kiơ̆ kơ ‘noh, Kơ dră Anih tơm vei lăng găh choh jang sa păng hơ tŏk tơ iung tơ ring tơ rang athei rim anih jang găh Anih tơm păng Anih vei lăng găh choh jang sa păng hơ tŏk tơ iung tơ ring tơ rang rim dêh char, pơ lei tơm găh Trung ương jang mă kơ tang rim trong jang vei lăng anih tĕch mơ dro lơ̆m teh đak, mă loi ‘noh vei rơ goh tơ mam sa tơ̆ dôm kơ chơ tơm tĕch tơ mam đơ̆ng choh jang sa, anih tĕch mơ dro tơ mam sa, ‘nhot, plei ‘long pơ yua ăn Têt; sek phak dôm tơ drong pơm glăi vă vei sơ đơ̆ng ‘lơ̆ng rơ goh tơ mam sa pơ yua ăn răt yua lơ̆m năr Têt Nguyên đán. Răp hơ len tơ drong tĕch, răt phe ƀa, tơ mam sa kăl lơ̆m năr Têt vă đei trong jang pơ găn tơ tom ưh kơ lê̆ đei ƀôh tơ drong ưh kơ măh tơ mam, tŏk kơ jă; vei sơ đơ̆ng pơm lăp tôm ‘meh vă răt yua đơ̆ng kon pơ lei hơ drol, lơ̆m păng đơ̆ng rŏng Têt Nguyên đán. Hơ dai hăm ‘noh, pơ trŭt pơm tơ lĕch, chơ, tĕch păng tĕch tơ lĕch tơ mam đơ̆ng choh jang sa tơ̆ teh đak đe lơ̆m khei ‘năr tang găn jĭ Covid 19…

Thuem: Tơ blơ̆