Pơma ah pơtôch hop akŏm, Tổng Bí thư, Kơdră teh đak bơ̆n Tô Lâm ră hơdah 6 sơnong jang tơm kăl akŏm pơm jang, lơ̆m noh athei sek tơlang pơkeh dôm tơdrong jang hloh khei năr pơkăp, dôm tơdrong tơhlăk tăk hlôi đei tơbang hơdah; kiơ̆ tơlĕch noh hơnih jang yơ iŏk jang athei pŭ sơnong jang păng tơdrong kơjăp 'lơ̆ng truh tôch. Ƀok pơtruh nơ̆r, hơtŏk kơtang chih akŏm vei răk tơdrong kăl băt păng dôm tơdrong yua atŭm, pơjing kơjă kăp gĭt ăn hơnih jang, kon pơlei, hơnih jang mŭk drăm, pơjing tơdrong chih akŏm vei răk, tơgop hơtŏk mŭk drăm sô̆ păng tơgop hơtŏk ăn tơdrong jang mŭk drăm.

Tổng Bí thư, Kơdră teh đak bơ̆n Tô Lâm tơrĕk kăp gĭt, athei vei sơđơ̆ng mạng, sơđơ̆ng tơroi tơbăt păng vei lăng tơdrong chih akŏm vei răk tơdrong kăl kơ teh đak, kơlih tơpă ăn ƀôh tơplih kơmăi kơsô̆ roi lang să noh tơdrong ưh đei sơđơ̆ng gah tơroi tơbăt, tơdrong tơdrŭt lơ̆m mạng, pơm glăi gah mạng, tơdrong pơm yoch ou to roi lơ. Ƀok ră hơdah: tơdrong tơchơ̆t đei jơnei lơ̆m jăl jang dang ei noh tơnăp trŏ kih luơ̆t tơlĕch, pơm jang kiơ̆ pơkăp pơ̆n tơchĕng pơ̆n pơm jang, khĭn pŭ sơnong păng ling lang yuk trong hơlou kơ bơngai chĕp kơ̆l.