Ƀô̆ đô̆i vei lăng tơring sơlam Đắk Lắk tơbăt hơdăh jang đang ‘lơ̆ng hloh hơnăp jang tăh kơ phiê̆u pôk rơih hrôih, hơdai hăm vei sơđơ̆ng tôch kơ ‘lơ̆ng lơ̆m ‘măng pôk rơih. Khŭl bơ̆jang kơ Anih pơgơ̆r ƀô̆ đô̆i vei lăng tơring sơlam dêh char Đắk Lắk hlôi năm hơlen lăng tơ̆ dôm anih jang ‘noh: Dôm kơđông lĭnh vei lăng tơring sơlam Ea H’Leo, Ia Rvê, Yok M’Bre, Sê Rê Pốk, Bo Heng, Yok Đôn, ‘Măng jang sơlam Đắk Ruê păng Tiểu đoàn Huấn luyện – Cơ động.

Tơ̆ dôm anih jang, khŭl bơ̆jang hlôi mơ̆ng kơdră pơgơ̆r dôm anih jang roi tơbăt pơtôch tơdrong jang hơmet ăn pôk rơih, lơ̆m noh akŏm lơ̆m tơdrong pơm kiơ̆ dôm hla ar athei đơ̆ng kơdră kơpal; tơdrong jang roi tơbăt khôi luơ̆t găh pôk rơih ăn kang ƀô̆, khŭl lĭnh păng kon pơlei tơring sơlam; tơdrong jang vei sơđơ̆ng tơpôl, sơđơ̆ng hơnih tăh kơ phiê̆u; hơmet ăn tơmam, pơrŏ hơnih tăh kơphiê̆u, kơthŭng tăh kơphiê̆u tơm păng kơthŭng kơphiê̆u hơmet hiă pơyua ăn pôk rơih hrôih.

Hăm dôm anih jang pơgơ̆r pôk rơih hrôih, khŭl bơ̆jang tơtă kơ rim kơdră đảng, kơdră pơgơ̆r dôm anih jang kăl kơ jang hơdai kơjăp hăm khŭl kơdră tơring jang ‘lơ̆ng tơdrong jang hơmet ăn, vei sơđơ̆ng hơnih tăh kơphiê̆u, trŏ tơdrong hơgăt; hơmet ăn tôm dôm kơthŭng tăh kơ phiê̆u răk hiă vă pơgơ̆r pôk rơih tơ̆ dôm hơnih gak vei lăng tơring sơlam, pơm tơdrong hiôk vă kang ƀô̆, khŭl lĭnh tŏk bŏk bơ̆jang hơnăp jang oei pôk rơih tôm, vei sơđơ̆ng trŏ tơdrong hơgăt đơ̆ng khôi luơ̆t.