VOV4.Bahnar – Năr 3/10, Anih jang Y tê̆ pơlei tơm Hồ Chí Minh xơkơ̆t tơdrong hơlen xĕch pham gen xơkơ̆t đei minh 'nu drăkăn ƀơm jĭ Chŭ đŏk. 'Nâu jing bơngai ƀơm jĭ Chŭ đŏk mă blŭng đei băt tơ̆ Việt Nam. Kiơ̆ Anih tơm Y tê̆, âu jing bơngai jĭ drăkăn 35 xơnăm, oei tơ̆ pơlei tơm Hồ Chí Minh; pơtơm hơbuh jĭ ăh năr 18/9/2022 tŏk bŏk oei năm tơmang tơ̆ Dubai (đơ̆ng khei 7/2022 truh năr 22/9/2022 vih truh Việt Nam) hăm tơdrong pơlŏ gleh lap, tơngiĕt, jĭ huan, jĭ kơ̆l păng hiĕn, đei lơ chŭ ƀrê ƀre ƀronh, pơkoih ăh ti, hơkâu jăn păng ƀŏ. Đơ̆ng rŏng vih truh Việt Nam ăh năr 23/9/2022, bơngai jĭ hlôi truh khăm hơlen tơ̆ Hnam pơgang Từ Dũ păng nhôm ƀơm tơdrong jĭ tơpoh, đei hơ 'nhăk truh Hnam pơgang Da liễu pơlei tơm Hồ Chí Minh. Tơ̆ âu, bơngai jĭ pơkăp oei tơklăh, iŏk hơlen pham, truh năr 25/9/2022, bơngai jĭ đei pơkăp dương tĭnh hăm jĭ Chŭ đŏk. Dang ei, jơhngơ̆m jăn bơngai jĭ xơđơ̆ng ƀiơ̆ bơih, ưh đei pơlŏ, pơtoi oei tơklăh adrô̆, hơmet jĭ tơ̆ Hnam pơgang hơmet jĭ Nhiê̆t đơ̆i pơlei tơm Hồ Chí Minh.  

VOV/Lan tơblơ̆ nơ̆r