VOV4.Bahnar - Hơ nơ̆ng tơ drong jang roi tơ ƀôh tĕch tơ lĕch tơ̆ teh đak đe dôm tơ mam đơ̆ng choh jang sa Việt Nam, pơ gê (22/7), Anih pơ trŭt mơ dro sa ( Anih tơm vei lăng găh mơ dro sa, kơ măy kơ mŏk) jang hơ dai hăm dôm anih jang găh mơ dro sa Việt Nam tơ̆ teh đak đe păng Anih vei lăng găh mơ dro sa, kơ măy kơ mŏk dêh char Dak Lak pơ gơ̆r ‘măng roi tơ ƀôh tơ drong tĕch tơ lĕch tơ̆ teh đak đe tơ mam sầu riêng Việt Nam. Lơ̆m teh đak dang ei đei dang 85.000 hek tar, plei rim sơ năm vă jê̆ 670.000 tấn.

Sầu riêng Dak Lak găh lơ tĕch kiơ̆ iŏk lom hlôi lak kơ đoh tăh krăl tơ ngiĕt

Tơ dra hơ drol truh sơ năm 2025 plei iŏk đei 1 triệu tấn. Dak Lak păng Tiền Giang ‘noh jĭ 2 dêh char đei teh să păng tơ mam sầu riêng lơ hloh lơ̆m teh đak. Tơ mam sầu riêng găh lơ đei tĕch tơ̆ teh đak đe kiơ̆ trong iŏk lom hlôi lak kơ đoh păng đei tăh krăl tơ ngiĕt tơ̆ anih tĕch mơ dro Trung Quốc, Đài Loan, 1 kơ sô̆ tŏ sĕt răt plei hơ drih tơ̆ anih tĕch mơ dro Nhật Bản. Tơ̆ jơ roi tơ ƀôh, dôm bơ ngai joăt jang, tang măt ăn dôm anih jang mơ dro sa Việt Nam tơ̆ Trung Quốc, Đài Loan, Nhật Bản, Australia, Thái Lan tơ tă truh dôm anih jang mơ dro sa Việt Nam găh dôm tơ drong gơh tĕch tơ̆ anih tĕch mơ dro, tơ mam ‘lơ̆ng, trong kla jên, trong chơ, ƀao hiêm tơ mam tĕch tơ̆ teh đak đe, hơ met pơ ‘lơ̆ng dôm tơ drong ưh kơ ‘lơ̆ng gô đei ƀôh lơ̆m kơ plăh tĕch tơ mam sầu riêng tơ̆ 1,2 anih tĕch mơ dro teh đak đe.

 Thuem: Tơ blơ̆