VOV4.Bahnar - Tơ̆ hơ năp dôm tơ drong ‘lơ̆ng đơ̆ng sơng pơ long năng tơ moi đơ̆ng tĕh đak đe, đơ̆ng rŏng hlŏh 2 khei tơ lĕch, Anih tơm vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng drơ̆ng nơ̆r hăm dôm anih tơm păng tơ ring tơ rang găh trong pơih ‘măng jang sơng tơ moi chă tơ mang lăng đơ̆ng tĕh đak đe đơ̆ng khei 5 truh. Jô̆ đơ̆ng khei 11 sơ năm 2021 truh dang ei, Việt Nam sơng đei 8500 ‘nu tơ moi đơ̆ng tĕh đak đe truh tơ̆ 3 tơ ring ‘nŏh Phú Quốc, Khánh Hòa, Quảng Nam. Đĭ đăng tơ moi mưh truh tơ̆ Việt Nam tơ tă lăp đon ngăl, tơ drong sơng iŏk đei bơ̆ jang sơ đơ̆ng ‘lơ̆ng.

Đơ̆ng tơ drong ‘nâu, Anih vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng hlôi tơ lĕch trong pơih ‘măng jang sơ lam vă sơng tơ moi đơ̆ng tĕh đak đe truh tơ̆ Việt Nam păng ăn tơ moi năm chă tơ mang lăng tơ̆ tĕh đak đe đơ̆ng khei 5/2022 truh tơ̆ rim ‘măng jang sơ lam apŭng plenh tĕh lơ̆m khei ‘năr oei đei jĭ hrei ‘nâu. Kiơ̆ dôm anih tĕch mơ dro, tơ drong roi tơ băt hrôih jơ năr pơih ‘măng ăn tơ moi chă tơ mang lăng đơ̆ng tĕh đak đe gô tơ gop sơng đei lơ tơ moi đơ̆ng tĕh đak đe. Dang ei đei 20 tơ ring chă tơ mang lăng tơm đei nơ̆r apinh sơng tơ moi, dôm anih jang kơ pal oei hơ nơ̆ng tơ gŭm ăn dôm tơ ring chă rơih khul chă tơ mang lăng đơ̆ng tĕh đak đe.

Dơ̆ng: Tơ blơ̆