VOV4.Bahnar - Dôm ‘măng hop akŏm kơ Anih pơ gơ̆r tơ goăt ASEAN (ACCC) păng Hop akŏm tơ goăt ASEAN ‘măng mă 13 pơ gơ̆r tơ̆ Phnom Penh, Campuchia đơ̆ng ‘năr 1 truh ‘năr 04/10. Kơ dră tang măt Nguyễn Hải Bằng, Kơ dră tang măt Khŭl Việt Nam tơ̆ ASEAN chĕp kơ̆l khŭl Việt Nam vang truh dôm hop akŏm. Tơ̆ jơ hop akŏm, Anih pơ gơ̆r tơ goăt tơ goăl ASEAN ‘măng mă 3/2022, dôm teh đak lăng ‘lơ̆ng lơ̆m tơ drong tơ lĕch Trong vă jang akŏm tơ goăt ASEAN 2025. Dôm teh đak jang hơ dai sơ kơ̆t hơ dăh hơ nơ̆ng tơ gŭm ASEAN tơ lĕch dôm tơ drong jang lơ̆m tơ drong vă jang, vă hơ tŏk loi dơ̆ng tơ klep hơ dai pơ jing tơ pôl ASEAN, păng tơ klep hơ dai đơ̆ng ASEAN păng dôm teh đak jang hơ dai, tơ gŭm tơ iung ming păng hơ tŏk tơ iung mŭk drăm tơ ring.

Hop akŏm tơ goăt ASEAN ‘măng mă 13 tơ̆ Phnom Penh, Campuchia

Hop akŏm Tơ goăt ASEAN ‘măng mă 13 sơ năm ‘nâu đei hơ năn: Hơ tŏk loi dơ̆ng Tơ goăt yak truh Tơ pôl ASEAN đơ̆ng rŏng 2025 kơ jăp, tôm tơ drong păng đei tŏk pran”. Lơ̆m 03 ‘măng pơ ma dơ nuh, dôm bơ ngai tang măt vang tơ roi găh tơ drong kơ tơ̆ng ang, tơ drong hlôh vao păng băt vao bơ̆ jang găh lăng truh tơ goăt ASEAN đơ̆ng rŏng 2025; pơ jing anih jang kăl păng kơ sô̆ ‘lơ̆ng kơ jăp vă hơ tŏk tơ drong tơ goăt jang hơ dai.

VOV/Thuem tơ blơ̆