Tơdrong hơpah Ƀăo chĭ dêh char Đăk Lăk 'măng mă ou đei 115 tak phâm lơ̆m 5 kơluăi ƀăo in, ƀăo điê̆n tư, rapor pơre nơ̆r, pơdah um rŭp păng rup ƀăo chĭ đei jơnei 'măng pơlong mă hơtuch. Jơnŭm pơgơ̆r pơlong hlôi rơih đei 61 tơmam hơpah đei 4 hơpah A, 8 hơpah B, 20 hơpah C păng 29 hơpah pơchhơp jơhngơ̆m.

Kiơ̆ Jơnŭm pơgơ̆r, dôm tak phâm pơtruh pơlong sơnăm ou tơguăt kơjăp hăm tơdrong hơrih, pơlan să tơdrong 'lơ̆ng lơ̆m tơpôl, ƀôh băt dôm trong jang 'lơ̆ng, trong jang gơh hơgei; atŭm hăm noh tơgop hơtŏk tơjră hăm dôm tơdrong kơnê̆, vei sơđơ̆ng đon tơchĕng 'lơ̆ng đơ̆ng Đảng. Mă kăl, đơ̆ng rŏng kơ hơgrop, tơdrong chih tak phâm roi đei pơih să, tơroi hơdah tơdrong hơrih tơ̆ tơring groi kông truh tơring tơter ddak dơsĭ tŏk bŏk. Lơ̆m kơsô̆ dôm hơnih jang đei iŏk hơpah sơnăm ou, Hơnih juăt jang tơ̆ tơring Tây Nguyên kơ Rađiô nơ̆r pơma Việt Nam đei 6 tak phâm đei iŏk jơnei 'noh 1 hơpah A, 1 hơpah B, 2 hơpah C păng 2 hơpah pơchhơp jơhngơ̆m.