VOV4.Bahnar - Ƀlep ƀơ̆t tơ băt 97 sơ năm Năr Hla ar chih kơ tơ̆ng ang Kach mang  Việt Nam, pơ gê ‘năr 21/6, tơ̆ pơ lei tơm Buôn Ma Thuột, Jơ nŭm chơ̆m ƀai pơ long hla ar chih kơ tơ̆ng ang dêh char Dak Lak pơ gơ̆r pơ jao “ Tơ mam hơ păh Hla ar chih kơ tơ̆ng ang dêh char Dak Lak ‘măng mă 2 sơ năm 2021”. Tơ mam hơ păh hla ar chih kơ tơ̆ng ang dêh char Dak Lak sơ năm ‘nâu đei 155 ƀai chih đơ̆ng dôm grŭp chih găh dôm anih jang chih kơ tơ̆ng ang tơ̆ dêh char păng trung ương oei tơ̆ dêh char vang pơ long tơ̆ dôm kơ loăi pơ re nơ̆r, pơ dăh rup, ƀăo in, ƀăo điên tư păng rup hla ar kơ tơ̆ng ang.

Grŭp chih ƀai iŏk đei yai A yai B hla ar chih tơ roi Dak Lak

Khŭl chơ̆m ƀai Hla ar chih kơ tơ̆ng ang dêh char Dak Lak hlôi rơ̆ih đei 52 ƀai ‘lơ̆ng hơ iă vă pơ jao tơ mam hơ păh, ‘noh 4 yai A, 8 yai B, 18 yai C păng dôm yăih pơ chhơp jơ hngơ̆m. Ƀok Nguyễn Văn Phú – Kơ dră Khŭl chih hla ar tơ roi dêh char Dak Lak - hơ len lăng, dôm ƀai chih vang pơ long sơ năm ‘nâu tă kơ ‘lơ̆ng ngăl, tơ roi tơ păt tơ drong chĭnh trĭ păng joh ayŏ - tơ pôl tơ̆ Dak Lak. Mă loi ‘noh sơ năm ‘nâu VOV Tây Nguyên jĭ 1 lơ̆m dôm anih jang vang pơ long tơ̆ lơ kơ loăi chih hla ar kơ tơ̆ng ang, păng iŏk đei 7 tơ mam hơ păh, lơ̆m noh đei yai A, 1 yai B, 2 yai C.

Thuem: Tơ blơ̆