VOV4.Bahnar - ‘Năr 21/7 tơ̆ Anih jang Trung ương Đảng, yă Trương Thị Mai, Bơ ngai jang lơ̆m Anih tơm Chĭnh trĭ, Bí thư Trung ương Đảng, Kơ dră Anih pơ gơ̆r Trung ương, Kơ dră Grŭp Nghị sĩ jang tơ bôl Việt - Nhật hlôi sơng Kơ dră Jơ nŭm vei lăng Anih mong jên Jang hơ dai apŭng plĕnh teh Nhật Bản (JBIC) Ma-ê-đa Ta-đa-si. Tơ̆ jơ sơng, yă Trương Thị Mai pơ ma hơ dăh, Việt Nam tŏk bŏk tơ lĕch Tơ drong tơ chơ̆t Hop akŏm XIII kơ Đảng, hơ drin vă iŏk đei tơ drong hơ găt jing teh đak hơ tŏk tơ iung lơ̆m tŏk bŏk anglŏ 21, pơ ma hơ dăh trong bơ̆ jang kiơ̆ trong jang tơ bôl hiôk hian, pơm tơm kơ dih, rơ ngei, jang tơ bôl, jang hơ dai păng hơ tŏk tơ iung, jang lơ trong, pơ vei lơ pang, lơ̆m noh tôch kơ lăng kăl tơ drong pơ vei jang hơ dai hăm Nhật Bản. Yă Trương Thị Mai athei JBIC hơ nơ̆ng hơ tŏk trong jang pơ ma dơ nuh đơ̆ng JBIC hăm dôm anih jang Việt Nam, hơ tŏk loi dơ̆ng tơ drong pơ vei jang hơ dai hăm dôm anih jang Khŭl kơ dră teh đak Việt Nam, hơ dai hăm tơ chĕng hơ len pơ̆ih să lơ jên tŏk iŏk ‘măn ăn dôm anih jang mơ dro sa Việt Nam dăh mă anih mơ dro sa hơ dai đơ̆ng anih jang mơ dro sa Nhật - Việt vang jang hơ dai tơ mơ̆t jên jang tơ̆ Việt Nam.

Thuem: Tơ blơ̆