VOV4.Bahnar – Dang ei, bơngai pơtăm sâu riêng tơ̆ apŭng Krông Pach, dêh char Đăk Lăk hlôi iŏk yua khei pơyan. Sâu riêng đei lơ plei mă lei kơjă tơjur, pơm ăn bơngai pơtăm sâu riêng lao đon.

Ƀok Tạ Văn Châm, phŏ Kơdră Anih vei lăng kon pơlei xăh Ea Yông ăn tơbăt: Jâ̆p xăh đei 2.000 ha sâu riêng, lơ̆m noh đei 1 rơbâu ha đei pĕ plei. Đei yua ăh pơyan âu hơbŏ hloh 20 rơbâu tâ̆n, đei tong anê̆ plei sâu riêng kơ jâ̆p apŭng. Adrol xơ̆ đei xơnăm sâu riêng Dona tŏk truh 80 rơbâu hlj 1 kĭ, xơnăm xơ̆ kơjă tĕch đơ̆ng 40 truh 45 rơbâu hlj. Xơnăm âu blŭng pơyan, sâu riêng J6 duh tĕch đei hloh 30 rơbâu hlj, Dang ei sâu riêng Dona hlôi đum mă bơngai răt ưh gan lăp. Phơ phŏ bơngai jang pơkăp kơjă hloh 40 rơbâu hlj, mă lei dang ei athei tơjur oei pă 25 rơbâu, phŏ noh kơđeh hloh noh pơtơm đei bơngai răt: “Dang ei noh sâu riêng tŏk bŏk oei iŏk yua mă lei kơyuơ pơrang jĭ Covid -19 hơbuh hli noh sâu riêng kơ kon pơlei xăh Ea Yông tơnap kơ tĕch tơlĕch kơlih ưh gơh tĕch ăn teh đak đe. Bơngai pơdro ưh kơ răt, dăh mă răt tŏ xĕt. Kơjă dang ei noh đơ̆ng 18 truh 25 rơbâu hlj kiơ̆ kơ plei ‘lơ̆ng dăh mă ưh”.

Kiơ̆ jô̆ hơlen đơ̆ng ƀok Y Ngắc Niê, Kơdră Jơnŭm kon pơlei jang chŭn xăh Ea Yông noh pơyan âu, kon pơlei lơ̆m xăh hlôi hiong hloh 400 tih hlj, kơlih kơjă tĕch sâu riêng Dona hơtŏ tong anê̆ kơjă xơnăm xơ̆: “Sâu riêng kơ kon pơlei khei năr âu hlôi đum păng ruh, kơjă tĕch roi năr roi tơjur. Truh khei năr âu noh đơ̆ng 20 truh 25 rơbâu hlj minh kĭ”

Nhôn năm truh pơgar hnam kơ ƀok Y Suông Niê tơ̆ pơlei Jung. Tơ̆ âu, hloh 10 ‘nu tŏk bŏk oei pĕ sâu riêng, hơtŏk tơ̆ gre chơ pơtruh ăn đăi lĭ. Ƀok Y Suông ăn tơbăt, unh hnam tĕch đei 7 tâ̆n, ‘năr âu noh iŏk đei 2 tâ̆n. Kơjă sâu riêng tơ̆ pơgar đei axong jing 3 kơloăi, kơđeh hloh noh 18 rơbâu hlj, 22 rơbâu hlj, păng 25 rơbâu hlj.  

Nhôn năm truh Anih jang tĕch răt tơmam hăm teh đak đe Dũng Thái Sơn tơ̆ thôn 4 xăh Ea Kênh. ‘Nâu jing Anih răt akŏm sâu riêng tih hloh tơ̆ apŭng Krông Pach. Ƀok Lê Viết Chiến phŏ kơdră anih jang tơroi: Gơnơm khei năr tơjê̆ âu, Anih jang hlôi axong jên vă ming man anih ‘măn hơngeo noh rim năr gơh pơm tơlĕch đei hloh 20 tâ̆n tơmam drăm.

Anih jang tŏk bŏk oei adrin răt tơmam pơtăm đei đơ̆ng kon pơlei. Mă lei kơyuơ pơrang jĭ Covid - 19, tơdrong chơ pơdŭ, tĕch răt tơnap tap. Ƀok Chiến ăn tơbăt, dang ei tơ̆ anih jang tam mă gơh tĕch tơmam ăn teh đak đe nhen dôm xơnăm adrol ki, tơmam mă lơ noh chơ tĕch tơ̆ plei tơm Hồ Chí Minh păng dôm dêh char Tây Nam ƀô̆, noh kơsô̆ răt tơmơ̆t duh tơjur, pơhlom đei 7.500 tâ̆n đĕch, hơtŏ tong anê̆ pơtêng hăm xơnăm adrol: “Pơkăp anih jang vă răt tơmơ̆t pơm tơlĕch đei 15.000 tâ̆n plei. Mă lei kơyuơ pơrang jĭ hơbuh hli, tơdrong tĕch răt adar, chơ pơdŭ tơnap tap, atŭm hăm jên hu adoi tơnap. Kơyuơ noh mă tơdrong pơkăp jang đei pơhlom 50% pơkăp đơ̆ng mă blŭng”.

Lan chih păng pơre nơ̆r